Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 348 Hüküm no: 280 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapamacı Asvador’un vefat eden İshak Ağa’da alacağı olduğu Kezâlik akd-i meclis-i şer‘-i şerîf ettikde kapamacı tâifesinden bâ‘isü’l-vesîka Asvador v. Artin nâm zimmî meclis-i ma‘kūd-ı mezkûrda müteveffâ-yı mezbûrun zevce-i metrûkesi ve sulbî sagīr oğlu Abdülkadir ve sulbiye sagīre kızı Saliha’nın vâlideleri ve tesviye-i emrlerine kıbel-i şer‘den vasiyye-i mansûbeleri olmağla tereke-i müteveffâ-yı mezbûra bi’l-verâse ve bi’l-vesâye vaz‘-ı yed eden Âişe Hatun bt. Mehmed tarafından husûs-ı âti’l-beyanda vekîl-i müsecceli olan Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah Hatun mahzarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde kapamacı metâ‘ı bahasından ba‘de-külli’l-hesâb dört yüz yirmi dört guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd <> edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mersûmdan müdde‘âsına ber-vech-i muharrer beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrun etbâ‘ından Mustafa Çelebi b. Ahmed ve Mehmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İshak Ağa b. Ali b. İshak hâl-i kemâl-i sıhhatinde işbu müdde‘î-i mezbûr Kapamacı Asvador kapamacı metâ‘ı bahasından ba‘de-külli’l-hesâb dört yüz yirmi dört guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi ilâ-âhırihî. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn