Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 350 Hüküm no: 283 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Hüseyin Çelebi’nin vefat eden İshak Ağa’da alacağı olduğu Kezâlik akd-i meclis-i şer‘-i şerîf ettikde yorganî tâifesinden işbu bâ‘isü’l-kitâb Hüseyin Çelebi b. Ahmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Abdülkadir’in ve sulbiye sagīre kızı Saliha’nın vâlideleri ve tesviye-i emrler[ine] kıbel-i şer‘den mansûbe vasiyyeleri olup tereke-i müteveffâ-yı mezbûra bi’l-verâse ve bi’l-vesâye vaz‘-ı yed eden Âişe Hatun bt. Mehmed tarafından husûs-ı âti’l-beyanda müseccel vekîli Ahmed Ağa b. Mehmed ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarlarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde yedimden müşterâ ve makbûz yorganî metâ‘ı bahasından dört yüz otuz bir guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i mezkûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsına beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrun etbâ‘ından Mustafa Çelebi b. Ahmed ve Salih Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İshak Ağa b. Ali b. İshak hâl-i kemâl-i sıhhatinde işbu müdde‘î-i mezbûr Yorganî Hüseyin Çelebi’ye yedimden müşterâ ve makbûz yorganî metâ‘ı bahasından dört yüz otuz bir guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz ilâ-âhırihî. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn