Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 351 Hüküm no: 284 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden kocası Mahmud Ağa’daki hakkını mirastan aldığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i şerîf-i enverden Mevlânâ İskilibî Mehmed Efendi irsâl olunup ol dahi mahmiye-i İstanbul’da Küçükmustafapaşa kurbünde Molla Hüsrev mahâllesinde sâkin el-Hâc Süleyman b. el-Hâc Süleyman’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Hocapaşa mahâllesi ahâlîsinden olup Beşiktaş’da Sultân Süleyman mahâllesinde sâkin iken bundan akdem vefât eden el-Hâc Mahmud Ağa b. el-Hâc Ahmed’in <> verâseti zevce-i menkûha-i metrûkesi Hadîce Hatun bt. Abdullah b. Abdullah ile sulbî oğlu Abdülbaki nâm bâliğ-i gayr-ı reşîde münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûreye ve bâkī yedi sehmi mezbûr Abdülbaki’ye isâbeti tahakkukundan sonra zevce-i mezbûre Hadîce Hatun tarafından vekîli olduğu zât-ı mezbûreyi ma‘rifet-i şer‘iyye ile ârifân mezbûr el-Hâc Süleyman Ağa b. el-Hâc Süleyman ve el-Hâc Ahmed b. İbrahim şehâdetleriyle vekâleti sâbit olan mârrü’z-zikr Sultân Süleyman mahâllesi imamı Hüseyin Efendi b. Mahmud meclis-i ma‘kūd-ı mezbûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan bâ‘isü’l-kitâb Halil Odabaşı Ağa b. Receb mahzarında bi’l-vekâle ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere müvekkilem mezbûrenin sümün hissisine isâbet eden elli bin otuz bir akçe ile müvekkilem mezbûrenin zevci müteveffâ-yı mezbûr zimmetinde mütekarrer ve ma‘kūdün-aleyh altmış bin akçe mehr-i müeccel [63a] ki cem‘an yüz on bin otuz bir akçeyi tereke-i müteveffâ-yı mezbûrdan olmak üzere vasiyy-i mezbûr Halil Odabaşı Ağa yedinden vekâletim hasebiyle tamâmen alıp kabz eyledim, min-ba‘d meblağ-ı mecmû‘-ı mezbûr yüz on bin otuz bir akçeden vasiyy-i mezbûr yedinde ve zimmetinde bir akçe ve bir habbe bâkī kalmayıp müvekkilem mezbûrenin terekesinden vasiyy-i mezbûr Halil Odabaşı Ağa’nın bi’l-vesâye makbûz ve masrûfuna müte‘allıka âmme-i da‘vâdan bi’l-vekâle zimmetini ibrâ-i âmm-ı kātı‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an mürsel Mustafa Çelebi b. el-Hâc Hasan ve Abdullah Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevm 4 min-Receb sene 1143. Şuhûdü’l-hâl: Çorbacı Süleyman Ağa b. Süleyman Efendi, İbrahim Efendi b. el-Hâc Yusuf, Derviş Mehmed Efendi b. Mehmed Emin, Mustafa Çelebi [b.] el-Hâc Hasan, el-Hâc Ahmed b. İbrahim, Abdullah Çelebi b. İbrahim