Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 352 Hüküm no: 285 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdar Mehmed Ağa’nın vasiyetini yerine getirmek üzere Osman Çelebi’yi vasi tayin ettiği Mahmiye-i İstanbul’da Mercan Ağa mahâllesinde vâki‘ Evliyâ Hanı’nda sâkin iken bundan akdem vefât eden Teberdâr Mehmed Ağa b. Ahmed’in ber-vech-i âtî vasiyy-i muhtârı olduğunu iddi‘â eden bâ‘isü’l-kitâb es-Seyyid Osman Çelebi b. İbrahim Efendi meclis-i ma‘kūd-ı mezkûrda müteveffâ-yı mezbûrun şerîki Mehmed Ağa b. İskender mahzarında üzerine da‘vâ ve takrîr-i kelâm edip müteveffâ-yı mezbûr Teberdâr Mehmed Ağa b. Ahmed b. Abdullah hâl-i hayâtında fevtinden üç ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī kalan terekem karındaşım oğlu Hasan’a îsâl oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ fevt olmağla müteveffâ-yı mezbûrun şerîki mezbûr Mehmed Ağa’nın zimmetinde re’s-i mâlı olan seksen guruşu bi’l-vesâye taleb ve tenfîz-i vesâyâ murâd eylediğimde mezbûr Mehmed Ağa mâni‘ olur, suâl olunsun dedikde gıbbe’s-suâl mezbûr Mehmed Ağa cevâbında müteveffâ-yı mezbûrun zimmetinde re’s-i mâlı olan seksen guruşu ikrâr lâkin müdde‘î-i mezbûrun ber-vech-i muharrer vasiyy-i muhtârı olduğunu inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Tavukpazarı kurbünde vâki‘ Yağlıkçı Hanı’nda sâkin Mehmed Çelebi b. Ali ve mârrü’z-zikr Evliyâ Hanı’nda sâkin Mehmed Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-vâki‘ müteveffâ-yı mezbûr Teberdâr Mehmed Ağa b. Ahmed b. Abdullah hâl-i hayâtında fevtinden üç ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekem karındaşım oğlu Hasan’a îsâl oluna deyü vasiyet edip tenfîzine huzûrumuzda işbu müdde‘î-i mezbûr es-Seyyid Osman’ı vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 13 min-Recebi’l-ferd sene 1143. Şuhûdü’l-hâl: Balizâde es-Seyyid Mustafa Efendi b. Mehmed, Derviş Mehmed Efendi b. Mehmed Emin, Hüseyin Ağa b. Mehmed, Ahmed Çelebi b. Hasan, el-Hâc İbrahim b. Hüseyin, Salih Çelebi b. Halil