Bab Mahkemesi 54 Numaralı Sicil (H. 1102 / M. 1691) cilt: 20, sayfa: 98 Hüküm no: 69 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdülmennân’ın evini Yusuf Bey b. Abdullah’a satması Hâlâ Voynuk Beyi olup Dârü’l-hilâfeti’l-aliyye Kostantıniyye el-mahmiye’de Edirnekapısı dâhilinde Ali Paşa-yı Atîk mahallesinde sâkin umdetü’l-emâcid ve’l-a‘yân Filibeli Mehmed Bey b. Abdülmennân b. Abdullah tarafından husûs-ı âti’z-zikri ikrâra vekîl olduğu yine mahalle-i mezbûre sükkânından Mehmed Ağa b. Ali ve el-Hâc Hüseyin b. Abdullah şehâdetleriyle şer‘an sâbit olan Mustafa Ağa b. Receb meclis-i şer‘-i şerîf-i enverde, işbu râfi‘ü’l-kitâb Yusuf Bey b. Abdullah mahzarında bi’l-vekâle ikrâr-ı tâm ve takrîr-i kelâm edip, müvekkilim mûmâ-ileyh Mehmed Bey akd-i âti’z-zikrin sudûruna değin silk-i mülkünde münselik olup, mahalle-i mezbûrda vâki‘ iki tarafdan kendinin âhar mülkü ve bir tarafdan Bedros zimmî mülkü ve bir tarafdan tarîk-i âm ile mahdûd fevkānî iki oda ve tahtânî bir oda ve sofa ve bi’r-i mâ’ ve kenîf ve avluyu müştemil mülk menzilini, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Yusuf Bey’e iki yüz elli esedî guruşa bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr iki yüz esedî guruşu yedinden tamâmen ahz u kabz edip, ba‘de’l-yevm menzil-i mahdûd-ı mezbûr merkūm Yusuf Bey’in mülk-i müşterâsı olmuşdur. Keyfe mâ yeşâ ve yahtâr mutasarrıf olsun dedi dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel sene 1102. Şuhûdü’l-hâl: Ali Çelebi b. Hasan, Mustafa Çelebi [b.] İbrahim, Ali Bey b. Mehmed, el-Hâc Kazım Çavuş, İsmail Çelebi (…), Hüseyin Çelebi b. Ahmed, (…), İbrahim Çelebi b. Ahmed.