Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 353 Hüküm no: 286 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süvari Mukabelecisi Mustafa Ağa’nın bazı şahıslara borcu olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ İskilibli Mehmed Efendi irsâl olunup ol dahi mahmiye-i İstanbul’da Akbıyık mahâllesi ahâlîsinden hâlâ süvârî mukābelecisi umdetü erbâbi’t-tahrîr ve’l-kalem izzetlü Ali Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûre sükkânından bâ‘isü’l-kitâb Musa Efendi b. Mehmed meclis-i ma‘kūd-ı mezkûrda mûmâ-ileyh es-Seyyid Ali Efendi’nin hazînedârı olup mahmiye-i mezbûrede Kabasakal mahâllesinde sâkin iken bundan akdem vefât eden Mustafa Ağa b. Nebi’nin sulbî sagīr oğlu Mehmed Emin’in tesviye-i umûruna kıbel-i şer‘den mansûb vasîsi olmağla terekesine bi’l-vesâye vâzı‘ü’l-yed olan el-Hâc Ahmed b. Abdülkerim mahzarında üzerine da‘vâ ve takrîr-i kelâm edip müteveffâ-yı mezbûr Hazînedâr Mustafa Ağa b. Nebi b. Abdullah zimmetinde cihet-i karz-ı şer‘îden on iki bin akçe hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağın terekesinden taleb ederim, suâl olunsun dedikde gıbbe’s-suâl ve’l-inkâr müteveffâ-yı mezbûrun dâyinlerinden Mustafa Çelebi b. Muslı meclis-i ma‘kūd-ı mezkûrda vasiyy-i mezbûr el-Hâc Ahmed mahzarında üzerine da‘vâ ve takrîr-i kelâm edip mezbûr Hazînedâr Mustafa Ağa b. Nebi b. Abdullah zimmetinde cihet-i karz-ı şer‘îden beş bin iki yüz altmış akçe hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağın terekesinden taleb ederim, suâl olunsun dedikde gıbbe’s-suâl ve’l-inkâr yine müteveffâ-yı mezbûrun dâyinlerinden İsa Bey b. el-Hâc Mehmed meclis-i ma‘kūd-ı mezkûrda vasiyy-i mezbûr el-Hâc Ahmed mahzarında üzerine da‘vâ ve takrîr-i kelâm edip müteveffâ-yı mezbûr Hazînedâr Mustafa Ağa b. Nebi b. Abdullah zimmetinde cihet-i karz-ı şer‘îden iki bin beş yüz elli akçe hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr yine müteveffâ-yı mezbûrun dâyinlerinden Süleyman Beşe b. Abdullah meclis-i ma‘kūd-ı mezkûrda vasiyy-i mezbûr el-Hâc Ahmed mahzarında üzerine da‘vâ ve takrîr-i kelâm edip müteveffâ-yı mezbûr Hazînedâr Mustafa Ağa b. Nebi b. Abdullah zimmetinde cihet-i deyn-i şer‘îden bin seksen akçe hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr zikr olunan müdde‘îlerden müdde‘âlarına beyyine taleb olundukda udûl-i ahrâr-ı ricâl-i Müslimînden Yazıcı Mehmed Çelebi b Ahmed ve Hüseyin Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Hazînedâr Mustafa Ağa b. Nebi b. Abdullah hâl-i kemâl-i sıhhatinde zikr olunan müdde‘îlerden mezbûr Musa Efendi’ye on iki bin akçe ve merkūm Mustafa Çelebi’ye beş bin iki yüz altmış akçe ve mezbûr İsa Bey’e iki bin beş yüz elli akçe ve merkūm Süleyman’a bin seksen akçe cihet-i karz-ı şer‘îden zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın zikr olunan müdde‘îlerden her bir vech-i şer‘î üzere tahlîf olunup mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel Ahmed Çelebi b. İsmail ve Mehmed Çelebi b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-şehri Rebî‘ülâhir sene 1143. Şuhûdü’l-hâl: Halil Ağa b. Hüseyin, Mustafa Çelebi b. Ali, İbrahim Ağa b. Ali, Ahmed Çelebi b. Mehmed, Hasan Çelebi b. Abdullah, Mehmed b. Receb