Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 365 Hüküm no: 294 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin vefat eden Hasan Beşe’nin oğlu olduğu Mahmiye-i İstanbul’da duhânî tâifesinden olup vilâyet-i Rumeli’de Yenice kazâsında sâkin iken bundan akdem vefât eden el-Hâc Hasan Beşe b. Abdullah’ın sulbî kebîr oğlu ve ber-vech-i âtî vârisi olduğunu iddi‘â eden bâ‘isü’l-kitâb Mehmed Çelebi b. ( ) meclis-i ma‘kūd-ı mezkûrda müteveffâ-yı mezbûrun mahmiye-i mezbûrede vâki‘ terekesini kabz ve veresesine îsâle bâ-hüccet-i şer‘iyye vasî ve kayyım nasb olunmağla terekesine bi’l-vesâye vâzı‘ü’l-yed olan Şehrî Mehmed Çelebi b. Ahmed mahzarında üzerine da‘vâ ve takrîr-i kelâm edip ben müteveffâ-yı mezbûr el-Hâc Hasan Beşe b. Abdullah b. Abdullah’ın firâşından hâsıl ve zevce-i menkûha-i metrûkesi olup kazâ-i mezbûrede sâkine Hanife Hatun bt. Mustafa’dan mütevellid sulbî oğlu olmağla verâseti bana ve zevcesi mezbûre Hanife Hatun’a ve sulbiye kebîre kızı Emetullah’a ve sulbî sagīr oğlu İsmail’e münhasıra ve tashîh-i meselesi kırk sehmden olmağla sihâm-ı mezbûrenin beş sehmi zevcesi mezbûre Hanife Hatun’a ve on dörder sehmi benim ile sagīr-i mezbûr İsmail’den her birimize ve yedi sehmi mezbûre Emetullah’a isâbet edip zikr olunan on dört sehme benden gayrı vâris ve terekesine âhar müstahak olmamağla tashîh-i mezbûr üzere bana isâbet eden hisse-i ırsiye-i ma‘lûmemi [65b] vasiyy-i mezbûr Mehmed Çelebi’den taleb eylediğimde bana teslîmden imtinâ‘ eder, suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin müdde‘î-i mezbûrun müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden kazâ-i mezbûre sükkânından olup mahmiye-i mezbûrede Karaman-ı Kebîr’de vâki‘ Şekerciler Hanı’nda misâfiren sâkin es-Seyyid Hasan Çelebi b. es-Seyyid Mustafa ve İbrahim Beşe b. Mustafa li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka işbu müdde‘î-i mezbûr Mehmed Çelebi müteveffâ-yı mezbûr el-Hâc Hasan Beşe b. Abdullah b. Abdullah’ın firâşından hâsıl ve zevce-i menkûha-i metrûkesi olup kazâ-i mezbûrede sâkine Hanife Hatun bt. Mustafa’dan mütevellid sulbî oğlu olmağla verâseti mezbûr Mehmed Çelebi’ye, zevcesi mezbûre ve sulbiye kebîre kızı Emetullah ve sulbî sagīr oğlu İsmail’e münhasıra ve tashîh-i meselesi kırk sehmden olmağla sihâm-ı mezbûrenin beş sehmi zevce-i mezbûre Hanife Hatun’a ve on dörder sehmi mezbûrân İsmail ve Mehmed’den her birine ve yedi sehmi kızı mezbûre Emetullah’a isâbet edip zikr olunan on dört sehmde müdde‘î-i mezbûrdan gayrı vâris ve terekesine âhar müstahak olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 11 min-Receb sene 1143. Şuhûdü’l-hâl: Mehmed Efendi b. İbrahim, Hasan Efendi b. Mustafa, el-Hâc Feyzullah Efendi b. Mehmed, es-Seyyid Ali Efendi b. es-Seyyid Yahya, Salih Çelebi b. Halil, Hüseyin Çelebi b. İslam, el-Hâc İbrahim b. Hüseyin, Mustafa Çelebi b. Hasan