Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 377 Hüküm no: 304 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Serkiz’in vefat eden Mehmed’de alacağı olduğu Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ es-Seyyid Yahya Efendi irsâl olunup ol dahi mahmiye-i İstanbul’da Üskübî mahâllesinde sâkin iken bundan akdem vefât eden el-Hâc Mehmed b. el-Hâc Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde sarrâf tâifesinden bâ‘isü’s-sifr Serkiz Ferahzat nâm zimmî meclis-i ma‘kūd-ı mezkûrda müteveffâ-yı mezbûrun dâmâdı ve evlâd-ı sıgārı Abdullah ve Âişe ve Zeyneb’in tesviye-i emrlerine kıbel-i şer‘den mansûb vasîleri olmağla terekesine bi’l-vesâye vâzı‘ü’l-yed olan Hasan Hoca b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed b. Abdullah b. Abdullah zimmetinde işbu yedimde olan bin yüz kırk iki senesi Muharremü’l-haramı gurresi târîhiyle müverrah mümzâ ve mahtûm temessük mûcebince cihet-i karz-ı şer‘îden bin sekiz yüz guruş hakkım olup hattâ müteveffâ-yı mezbûr hâl-i kemâl-i sıhhatinde târîh-i mezkûrda meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kâtib Şemseddin mahâllesinde [sâkin] Kapıcı Mehmed Çelebi b. Mahmud ve Azebler mahâllesinde sâkin Ali Ağa b. Abdurrahman li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. Abdullah b. Abdullah işbu müdde‘î-i mesfûr Sarrâf Serkiz v. …? zimmîye yedinde olan kırk iki senesi Muharremü’l-haramı gurresi târîhiyle müverrah mümzâ ve mahtûm temessük mûcebince cihet-i karz-ı şer‘îden bin sekiz yüz guruş zimmetinde vâcibü’l-edâ deyni olduğunu hâl-i kemâl-i sıhhatinde târîh-i mezkûrda huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan el-Hâc Mehmed b. Ahmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 14 min-Recebi’l-ferd sene 1143. Şuhûdü’l-hâl: Ali Odabaşı b. el-Hâc Abdullah, İbrahim Odabaşı b. Ali, Süleyman Çavuş Ağa b. Mustafa, Süleyman Efendi b. el-Hâc Yusuf, Ahmed Çelebi b. Mehmed, el-Hâc Yusuf b. el-Hâc Ahmed, el-Hâc Ahmed b. Abdullah, Hüseyin Çelebi b. Ebubekir, el-Hâc Davud b. Ali, el-Hâc İbrahim b. Hüseyin, el-Hâc Mehmed b. Ahmed ve gayruhum