Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 378 Hüküm no: 305 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin evini hanımı Ayşe Hatun’a sattığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ İbrahim Efendi b. el-Hâc Yusuf irsâl olunup ol dahi mahmiye-i İstanbul’da Küçükmustafapaşa mahâllesinde sâkin Mustafa Çelebi b. Mahmud’un menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mezbûr Mustafa Çelebi meclis-i ma‘kūd-ı mezkûrda hâlâ zevce-i menkûhası sâhibetü’l-kitâb Âişe Hatun bt. Halil b. Abdullah tarafından husûs-ı âti’z-zikri tasdîka vekîl-i müsecceli el-Hâc İsmail b. Mehmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahâlle-i mezbûrede vâki‘ bir tarafdan el-Hâc İsmail b. Mehmed menzili ve bir tarafdan Şerbetçi kızı Âişe Hatun bt. Ali mülkü ve bir tarafdan dâhiliye ta‘bîr olunur benim mülk menzilim ve bir tarafdan tarîk-i âm ile mahdûd bir bâb fevkānî oda ve dehliz ve tahtında bir kenîf ve bir ahırı müştemil hâriciye ta‘bîr olunur mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile zevcem müvekkile-i mezbûre Âişe Hatun’a iki yüz elli guruşa bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr iki yüz elli guruşu zevcem müvekkile-i mezbûre Âişe Hatun yedinden bi’t-tamâm ve’l-kemâl ahz u kabz eyledim, ba‘de’l-yevm hudûd-ı mezbûre ile mahdûd olan hâriciye-i menzil zevcem mezbûre Âişe Hatun’un mülk-i müşterâsı ve hakk-ı sarîhi olmuşdur, keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an irsâl olunan Mustafa Çelebi b. Hasan ve Abdullah Çelebi b. Abdurrahim ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: el-Hâc İbrahim b. Mahmud, Hâfız Mehmed Efendi, Mehmed Efendi b. Ahmed, el-Hâc Süleyman keresteci, Molla İsmail b. Mustafa, Mehmed Çelebi b. Mustafa