Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 379 Hüküm no: 306 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah ve Saliha hatunların, kendilerine miras kalan evdeki hisselerini Abdullah Efendi’ye sattıkları Mahmiye-i İstanbul’da Tuti Latif mahâllesi ahâlîsinden iken bundan akdem vefât eden Mehmed Sadık Efendi b. Salih Efendi’nin verâseti zevce-i menkûha-i metrûkesi Rukıye Hatun bt. Abdullah ile sulbî oğulları Abdullah Efendi ve Molla Mustafa ve sulbiye kızları Emetullah Hatun ve Saliha Hatun’a münhasıra olup ba‘dehû mezbûr Molla Mustafa dahi vefât edip verâseti vâlidesi mezbûre Rukıye Hatun ile li-üm karındaşı Ahmed’e ve li-ebeveyn karındaşı mezbûr Abdullah Efendi’ye ve li-ebeveyn kız karındaşları mezbûretân Emetullah Hatun ve Saliha Hatun’a münhasıra olup ba‘dehû mezbûr Ahmed dahi vefât edip verâseti vâlidesi mezbûre Rukıye Hatun ile babası Süleyman Çelebi b. Abdullah’a münhasıra olup ba‘dehû mezbûre Rukıye Hatun dahi vefât edip verâseti zevc-i metrûkü mezbûr Süleyman Çelebi ile sadrî kebîr oğlu mezbûr Abdullah Efendi’ye ve sadrî sagīr oğulları Hüseyin ve Hamza ve sadriye kebîre kızları mezbûretân Emetullah Hatun ve Saliha Hatun’a münhasıra olup ba‘dehâ sagīr-i mezbûr Hüseyin dahi vefât edip verâseti babası mezbûr Süleyman Çelebi’ye münhasıra ve tashîh-i meselesi bi-hükmi’l-münâsahati’ş-şer‘iyye altı bin dokuz yüz on iki sehmden olup sihâm-ı mezbûrenin iki bin dokuz yüz otuz dört sehmi mezbûr Abdullah Efendi’ye ve yedi yüz doksan sekiz sehmi mezbûr Süleyman Çelebi’ye ve iki yüz kırk altı sehmi mezbûr Hamza’ya ve bin dört yüz altmış yedişer sehmi mezbûretân Emetullah Hatun ve Saliha Hatun’dan her birine isâbet eylediği şer‘an zâhir ve mütebeyyin oldukdan sonra mezbûre Emetullah Hatun’un zevci ve tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Abdülbaki Beşe b. Yusuf ve Ömer Beşe b. Eyüb şehâdetleriyle vekâleti sâbit ve sübût-ı vekâletine hükm olunan Mehmed Efendi b. Hasan Efendi ile mezbûr Saliha Hatun’un zevci ve tarafından husûs-ı âti’z-zikri kezâlik ikrâra vekîl olduğu şâhidân-ı mezbûrân şehâdetleriyle sâbit ve sübût-ı vekâletine hükm olunan Ali Çavuş b. Hüseyin meclis-i ma‘kūd-ı mezkûrda işbu sâhibü’l-kitâb mezbûr Abdullah Efendi mahzarında her biri bi’l-vekâle ikrâr ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı olup mahâlle-i mezbûrede vâki‘ bir tarafdan ba‘zan Hadîce Hatun ve ba‘zan Ali Beşe ve Mehmed Çelebi veresesi menzilleri ve ba‘zan Sâ‘atci Mehmed Çelebi vâlidesi mülkü ve bir tarafdan Yorganî Ömer Ağa Vakfı olan odalar ve bir tarafdan Mehmed Çelebi mülkü ve ba‘zan Molla Yusuf mülkü ve ba‘zan Osman Çavuş menzili ve bir tarafdan tarîk-i âm ile mahdûd hâriciyede tahtânî dört bâb oda ve bir havuz ve bir şâdırvan ve iki su kuyusu ve bir mikdâr bağçe ve bir mikdâr havlu ve dâhiliyede fevkānî iki bâb oda ve bir dehliz ve tahtânî bir matbâh ve bir harâba müşrif oda ve bir ahır ve bir kenîf ve bir su kuyusu ve bir mikdâr havluyu müştemil mülk menzilden tashîh-i mezbûr üzere müvekkilelerim mezbûretân Emetullah Hatun ve Saliha Hatun hisselerine isâbet eden bin dörder yüz altmış yedişer sehm-i şâyi‘alarını bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden [ârî] bey‘-i bâtt-ı sahîh-i şer‘î ile karındaşları mûmâ-ileyh Abdullah Efendi’ye her biri kırk beşer guruşa bey‘ ve temlîk edip mezbûr Abdullah Efendi dahi ber-vech-i muharrer iştirâ ve temellük ve kabûl eyledikden sonra semenleri olan meblağ-ı mezbûr kırk beşer guruşu müvekkilelerimiz mezbûretân Emetullah Hatun ve Saliha Hatun karındaşları mezbûr Abdullah Efendi yedinden her biri bi’t-tamâm ve’l-kemâl ahz u kabz eylediler, ba‘de’l-yevm hudûd-ı mezkûre ile mahdûd olan mülk menzilin tashîh-i mezbûr üzere iki bin dokuz yüz otuz dört sehmi ırsen ve iki bin dokuz yüz otuz dört sehmi dahi şirâen mezbûr Abdullah Efendi’nin mülk-i sarîhi olup müvekkilelerimiz mezbûretânın kat‘â alâkaları kalmamışdır, keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 16 min-Recebi’l-ferd sene 1143. Şuhûdü’l-hâl: Osman Efendi b. Hasan el-İmam, el-Hâc Ali b. Mustafa, el-Hâc Abdullah b. el-Hâc Mehmed, Musa Ağa b. Nasuh, İbrahim Ağa b. Halil, es-Seyyid Hüseyin Çelebi b. es-Seyyid Mehmed, İbrahim Efendi b. Hasan, Mustafa Efendi b. Salih Mehmed, Mustafa Çelebi b. Ali, Abdullah Odabaşı b. Mustafa, Mehmed Odabaşı b. Mustafa, Mustafa Beşe b. Ali, Veyis Odabaşı b. Halil, Abdülbaki Beşe b. Yusuf, Ali Çelebi b. Hüseyin