Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 381 Hüküm no: 308 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş Hasan Beşe’nin hayattayken cariyesi Gülbeyaz’ı azat ettiği Husûs-ı âti’z-zikrin mahâllinde istimâ‘ ve tahrîri için bi’l-iltimâs savb-ı şer‘-i enverden mezûnen Mevlânâ Abdülbaki Efendi b. Ahmed Efendi irsâl olunup ol dahi mahmiye-i İstanbul’da Kemâl Paşa mahâllesinde sâkin fahrü’l-akrân Hüseyin Ağa b. Süleyman’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı âti’z-zikre rıkk-ı sâbıkını mu‘terife işbu orta boylu kara kaşlı kara gözlü Gürciyetü’l-asl Müslimetü’l-millet bâ‘isetü’l-kitâb Gülbeyaz bt. Abdullah meclis-i ma‘kūd-ı mezkûrda mahmiye-i mezbûrda Unkapanı kurbünde Hoca Halil Attâr mahâllesinde sâkin iken bundan akdem vefât eden Serdengeçdi Nakkaş Hasan Beşe b. Süleyman’ın sulbî sagīr oğulları İbrahim ve Hasan’ın li-ebeveyn ammileri ve tesviye-i emrlerine bâ-hüccet-i şer‘iyye vasiyy-i muhtârları olmağla rıkk olup terekeden olmak üzere kendüye bi’l-vesâye vâzı‘ü’l-yed olan mezbûr Hüseyin Ağa ile müteveffâ-yı mezbûrun zevce-i menkûha-i metrûkeleri Ümmügülsüm Hatun bt. el-Hâc Mustafa ve Âişe Hatun bt. Mehmed mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr Nakkaş Hasan Beşe b. Süleyman b. Ahmed hâl-i kemâl-i sıhhatinde fevtinden bir ay mukaddem yedinde abd-i memlûkü olduğum hâlde beni huzûr-ı Müslimînde mâlından tahrîr ve i‘tâk ve sâir harâir-i asliyât zümresine idrâc ve ilhâk edip ben sâir asliyât gibi hürre olmuşken vasiyy-i mezbûr Hüseyin Ağa ile mezbûretân Ümmügülsüm Hatun ve Âişe Hatun rıkk olup terekeden olmak üzere bana bi-gayrı hakkın vaz‘-ı yed ederler, suâl olunup sebîlim tahliye ve kasr-ı yedlerine mezbûrûna tenbîh olunmak matlûbumdur dedikde gıbbe’s-suâl mezbûrûn cevâblarında mevsûfe-i mezbûreye ber-vech-i muharrer vaz‘-ı yedlerini ikrâr lâkin müdde‘iye-i mezbûrenin ber-vech-i muharrer müdde‘âsını inkâr etmeleriyle mevsûfe-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden zikr olunan Hoca Halil Attâr mahâllesinde sâkin Molla Hüseyin b. Mehmed ve Kemâl mahâllesinde sâkin Abdülkerim Çelebi b. Mehmed ve Halil Bey b. Ahmed li-ecli’ş-şehâde meclis-i ma‘kūd-ı mezkûra hâzirûn olup istişhâd olunduklarında fi’l-hakīka müteveffâ-yı mezbûr Nakkaş Hasan Beşe b. Süleyman b. Ahmed hâl-i kemâl-i sıhhatinde fevtinden bir ay mukaddem mevsûfe-i mezbûre Gülbeyaz’ı yedinde câriye-i memlûkesi olduğu hâlde huzûrumuzda mâlından tahrîr ve i‘tâk ve sâir harâir-i asliyât zümresine idrâc ve ilhâk edip mevsûfe-i mezbûre Gülbeyaz sâir harâir-i asliyât gibi hürre olmuşdur, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan Çelebi b. Ramazan ve Salih Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 12 min-Recebi’l-ferd sene 1143. Şuhûdü’l-hâl: Mehmed Efendi b. Hasan, Mehmed Beşe b. Süleyman, el-Hâc Mustafa b. Mehmed, Halil Çelebi b. Mehmed, Hasan b. Ömer, Mehmed Çelebi b. Yusuf