Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 382 Hüküm no: 309 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serdengeçdi Hasan Beşe’nin hanımları Ayşe ve Ümmügülsüm hatunların terekeden haklarını aldıkları Kezâlik akd-i meclis-i şer‘-i şerîf ettikde mahmiye-i mezbûrede Unkapanı kurbünde Hoca Halil Attâr mahâllesinde sâkin iken bundan akdem vefât eden Serdengeçdi Hasan Beşe b. Süleyman’ın verâseti zevce-i menkûha-i metrûkeleri Âişe Hatun bt. Mehmed ve Ümmügülsüm Hatun bt. el-Hâc Mustafa ile sulbî sagīr oğulları İbrahim ve Hasan’a ve vilâyet-i Anadolu’da medîne-i Kayseriye’de Tire karyesinde sâkin babası mezbûr Süleyman b. Ahmed’e ve vâlidesi Neslihan Hatun bt. Mehmed’e münhasıra ve tashîh-i meselesi kırk sekiz sehmden olmağla sihâm-ı mezbûrenin üçer sehmi zevceleri mezbûretândan her birine ve on üçer sehmi oğulları sagīrân-ı mezbûrândan her birine ve sekiz sehmi babası mezbûr Süleyman’a ve sekiz sehmi vâlidesi mezbûre Neslihan Hatun’a isâbeti tahakkukundan sonra zâtı Mehmed Beşe b. Süleyman ve el-Hâc Mustafa b. Mehmed ta‘rîfleriyle mu‘arrefe olan zevce-i mezbûre Âişe Hatun meclis-i ma‘kūd-ı mezbûrda müteveffâ-yı mezbûrun li-ebeveyn karındaşı ve sulbî sagīr oğulları mezbûrân İbrahim ve Hasan’ın tesviye-i emrlerine ve gāibân-ı mezbûrânın hisse-i ırsiyelerini ahz u kabz [ve] îsâle bâ-hüccet-i şer‘iyye vasiyy-i muhtârları olmağla terekesine bi’l-vesâye vâzı‘ü’l-yed olan bâ‘isü’l-kitâb mezbûr Hüseyin Ağa mahzarında ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere hisseme isâbet eden dört bin yüz seksen iki akçe ile müteveffâ-yı mezbûr zimmetinde mütekarrer ve ma‘kūdün-aleyh altı bin iki yüz akçe ki [cem‘an] on bin üç yüz seksen iki akçeyi tareke-i müteveffâ-yı mezbûrdan olmak üzere vasiyy-i mezbûr Hüseyin Ağa bana tamâmen def‘ u teslîm, ben dahi yedinden alıp kabz eyledim, meblağ-ı mezbûrdan vasiyy-i mezbûr yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î zâtı mu‘arrifân-ı mezbûr ta‘rîfleriyle mu‘arrefe olan zevce-i mezbûre Ümmügülsüm Hatun meclis-i mezbûrda vasiyy-i mezbûr Hüseyin Ağa mahzarında ikrâr ve takrîr-i kelâm edip zevcim müteveffâ-yı mezbûr Hasan Beşe’nin terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere hisseme isâbet eden dört bin yüz seksen iki akçe ile zevcim müteveffâ-yı mezbûr zimmetinde mütekarrer ve ma‘kūdün-aleyh yedi bin iki yüz seksen iki akçeyi tereke-i müteveffâ-yı mezbûrdan olmak üzere vasiyy-i mezbûr Hüseyin Ağa bana tamâmen def‘ u teslîm, ben dahi yedinden bi’t-tamâm alıp kabz eyledim, meblağ-ı mezbûrdan vasiyy-i mezbûr yedinde bir akçe ve bir habbe hakkım bâkī kalmadı dedikde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn