Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 383 Hüküm no: 310 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Odabaşı’nın varislerinden Halil’in terekeden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Mehmed Efendi b. Osman irsâl olunup ol dahi mahmiye-i İstanbul’da Seydi Ömer mahâllesinde sâkin iken bundan akdem vefât eden Süleyman Odabaşı b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Mehmed ile sadriye sagīre kızı Âişe’ye ve li-ebeveyn er karındaşı oğlu Halil b. Mehmed’e münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûre Fâtıma Hatun’a ve dört sehmi sagīre-i mezbûre Âişe’ye ve bâkī üç sehmi mezbûr Halil’e isâbeti tahakkukundan sonra mezbûr Halil meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan bâ‘isü’l-kitâb Süleyman Çelebi b. Mustafa mahzarında bi’l-verâse ikrâr ve takrîr-i kelâm edip mûrisim müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî ve tashîh-i mezbûr [üzere] hisseme isâbet eden elli sekiz bin beş yüz on altı akçeyi vasiyy-i mezbûr bana def‘ u teslîm, ben dahi tereke-i müteveffâ-yı mezbûrdan olmak üzere yedinden bi’t-tamâm ve’l-kemâl alıp kabz eyledim, meblağ-ı mezbûr elli sekiz bin beş yüz on altı akçeden vasiyy-i mezbûr Süleyman Çelebi yedinde bir akçe ve bir habbe bâkī kalmayıp ba‘de’l-yevm vasiyy-i mezbûrun makbûz ve masrûfuna müte‘allıka âmme-i de‘âvî ve mutâlebât ve kâffe-i eymân ve muhâsamâtdan vasiyy-i mezbûr Süleyman Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan el-Hâc Mehmed b. Ahmed ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 13 min-Recebi’l-ferd sene 1143. Şuhûdü’l-hâl: İbrahim Efendi b. Ahmed, Molla Numan b. İbrahim, Mehmed Çelebi b. Ahmed, Mehmed Beşe b. Hüseyin, Molla İbrahim b. Halil, Halil b. Ahmed, Ebubekir Odabaşı b. Ömer