Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 384 Hüküm no: 311 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe’nin vefat eden Süleyman Odabaşı’nın varislerinden olduğu Kezâlik akd-i meclis-i şer‘-i şerîf ettikde müteveffâ-yı mezbûrun li-ebeveyn er karındaşı oğlu usûbet-i nesebiye cihetinden ber-vech-i âtî vârisi olduğunu iddi‘â eden işbu bâ‘isü’l-kitâb Halil Beşe b. Mehmed meclis-i ma‘kūd-ı mezkûrda müteveffâ-yı mezbûrun sulbiye sagīre kızı Âişe’nin tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Süleyman Çelebi b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Süleyman Odabaşı benim babam mezbûr Mehmed ile li-ebeveyn karındaşlar olup babaları ismi Ahmed, dedeleri ismi İbrahim, vâlideleri ismi Âişe bt. İbrahim ve maskat-ı re’sleri vilâyet-i Anadolu’da medîne-i Kütahya nâhiyelerinden Örencik nâhiyesine tâbi‘ Ağarı karyesi olmağla müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Mehmed ile sulbiye sagīre kızı mezbûre Âişe ve usûbet-i nesebiye cihetinden bana münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûre Fâtıma Hatun’a ve dört sehmi sagīre-i mezbûre Âişe’ye ve bâkī üç sehmi bana isâbet edip zikr olunan üç sehme benden gayrı vâris ve müstahakk-ı âhar ol[ma]mağla hisse-i ırsiye-i şer‘iyyemi vasiyy-i mezbûrdan taleb eylediğimde bana teslîmden imtinâ‘ eder, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Dergâh-ı âlî yeniçerilerinin dokuzuncu sekbânlar odası bekçisi Ebubekir Odabaşı b. Ömer ve oda-i mezbûr neferâtından Ömer Beşe b. Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Süleyman Odabaşı işbu müdde‘î-i mezbûr Halil’in babası Mehmed ile li-ebeveyn karındaşlar olup babaları ismi Ahmed ve dedeleri ismi İbrahim, vâlideleri ismi Âişe bt. İbrahim ve maskat-ı re’sleri vilâyet-i Anadolu’da medîne-i Kütahya nâhiyelerinden Örencik nâhiyesine tâbi‘ Ağarı karyesi olmağla müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Mehmed ile sulbiye sagīre kızı Âişe’ye ve usûbet-i nesebiye cihetinden işbu müdde‘î-i mezbûr Halil’e münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûre Fâtıma Hatun’a ve dört sehmi sagīre-i mezbûre Âişe’ye ve bâkī üç sehmi cihet-i mezbûrdan işbu müdde‘î-i mezbûr Halil’e isâbet edip zikr olunan üç sehme cihet-i merkūmeden müdde‘î-i mezbûrdan gayrı vâris ve müstahakk-ı âhar olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn.