Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 385 Hüküm no: 312 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anana bt. Yuvan’ın vasiyetini yerine getirmek üzere kocası Kostantin’i vasi tayin ettiği Askerî tâifesinden olup mahmiye-i İstanbul’da Gül Câmi‘-i şerîfi mahâllesinde mütemekkin Kostantin v. Yani nâm Nasrânînin zevcesi olup mesfûr Kostantin Nasrânî meclis-i şer‘-i şerîf-i enverde hâlike-i mesfûrenin zâhirde zevci mesfûr Kostantin’den gayrı vâris-i ma‘rûfu olmayıp terekesinin nısfı zevci mesfûr ve nısf-ı âharı cânib-i beytülmala âid olmağın mahmiye-i mezbûrede tâife-i mezbûrenin bâ-fermân-ı âlî beytülmallarını kabza ve husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mahmud Ağa b. Ahmed tarafından vekîl-i sâbitü’l-vekâlesi Salih Beşe b. Halil mahzarında üzerine da‘vâ ve takrîr-i kelâm edip zevcem hâlike-i mesfûre Anana bt. Yuvan v. Panayot hâl-i marazında hâlike olmazdan on gün mukaddem bi-emrillâhi te‘âlâ hâlike olduğumda cemî‘ terekem ahz u kabz olunup düyûn-ı müsbetem edâ olundukdan sonra bâkī kalan terekemin sülüsü ifrâz olunup sülüs-i mezbûreden iki bin akçe Hasköyü nâm mahâlde vâki‘ kilise dâhilinde lâşemi hâke idhâl için sarf oluna ve bin beş yüz akçe zikr olunan Gül Câmi‘i mahâllesinde vâki‘ kilisede olan kanâdîllere sarf oluna ve bin beş yüz akçe Parmakkapı kurbünde vâki‘ kilisede olan kanâdîllere sarf oluna ve iki bin akçe lâşemi tahmîl eden on beş nefer papas ve keşişlere verile ve iki bin beş yüz akçe tabh-ı ta‘âm için fukarâya sarf oluna ve sülüs-i mezbûreden her ne kalırsa vasiyy-i muhtârım re’yiyle dilediği yere sarf oluna deyü vasiyet edip tenfîzine Nasârâ muvâcehesinde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ zevcem mesfûre hâlike olmağla tenfîz-i vesâyâ murâd eylediğimde müvekkil-i merkūm mâni‘ olur, vekîl-i mezbûrdan suâl olunsun dedikde gıbbe’s-suâl vekîl-i merkūm cevâbında müvekkili mûmâ-ileyhin hâlike-i mezbûrenin terekesinin nısf-ı âharına vaz‘-ı yedini ikrâr lâkin müdde‘î-i mesfûrun müdde‘âsını inkâr edicek, müdde‘î-i merkūmdan müdde‘âsına beyyine taleb olundukda udûl-i <> ricâlden olup sâlifü’z-zikr Gül Câmi‘-i şerîfi mahâllesinde mütemekkin Kiryako v. Nikola ve Yorgi v. Gavril nâm Nasrânîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka şahsı rü’yetimiz ile ma‘lûmumuz olan hâlike-i mesfûre Anana bt. Yuvan v. Panayot hâl-i marazında hâlike olmazdan on gün mukaddem bi-emrillâhi te‘âlâ hâlike olduğumda cemî‘ terekem ahz u kabz olunup düyûn-ı müsbetem edâ olundukdan sonra bâkī kalan terekemin sülüsü ifrâz olunup sülüs-i mezbûreden iki bin akçe Hasköyü nâm mahâlde vâki‘ kilise dâhilinde lâşemi hâke idhâl için sarf oluna ve bin beş yüz akçe zikr olunan Gül Câmi‘i mahâllesinde vâki‘ kilisede olan kanâdîllere sarf oluna ve bin beş yüz akçe Parmakkapı kurbünde vâki‘ kilisede olan kanâdîllere sarf oluna ve iki bin akçe lâşemi tahmîl eden on beş nefer papas ve keşişlere verile ve iki bin beş yüz akçe tabh-ı ta‘âm için fukarâya sarf oluna ve sülüs-i mezbûreden her ne fazla kalır ise vasiyy-i muhtârım re’yiyle dilediği yere sarf oluna deyü vasiyet edip tenfîzine müdde‘î-i mezbûru muvâcehemizde vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ mesfûr Anana Nasrâniye hâlike oldu, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de-ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 11 min-Recebi’l-ferd sene 1143. Şuhûdü’l-hâl: Mehmed Efendi b. İbrahim, el-Hâc Feyzullah Efendi b. Mehmed Efendi, es-Seyyid Ali Efendi b. Şeyhi Efendi, Hüseyin Çelebi b. İslam, Ahmed Çelebi b. Hüseyin, el-Hâc İbrahim b. Hüseyin, Mustafa Çelebi b. Hasan, diğer Salih Çelebi b. Abdullah, diğer Ahmed Çelebi b. İsmail