Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 386 Hüküm no: 313 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anana bt. Yuvan’ın ölümüyle terekeden beytülmala kalan kısmın teslim edildiği Askerî tâifesinden olup mahmiye-i İstanbul’da Gül Câmi‘-i şerîfi mahâllesinde mütemekkin Kürkçü Kostantin v. Yani nâm Nasrânînin zevcesi olup bundan akdem hâlike olan Anana bt. Yuvan nâm Nasrâniyenin zâhirde zevci merkūm Kostantin’den gayrı vâris-i ma‘rûfu olmayıp terekesinden nısfı zevci mesfûra ve nısf-ı âharı cânib-i beytülmala âid olmağın mahmiye-i mezbûrda tâife-i mesfûrenin bâ-fermân-ı âlî beytülmallarını kabza memûr olan fahrü’l-akrân es-Seyyid Mustafa b. Ahmed meclis-i şer‘-i şerîf-i enverde hâlike-i mesfûrenin zevci olmağla terekesine bi’l-verâse vâzı‘ü’l-yed olan işbu hâmilü’s-sifr mesfûr Kostantin muvâcehesinde bi’l-emâne ikrâr ve takrîr-i kelâm edip hâlike-i merkūme Anana Nasrâniyenin terekesi tahrîr ve ba‘de-ihrâci’l-masârıf ve’s-sülüs ber-mûceb-i defter-i kassâm-ı askerî cânib-i beytülmala âid olan on bin dokuz yüz altmış üç akçeyi tereke-i hâlike-i merkūmeden olmak üzere zevci mesfûr Kostantin Nasrânî yedinden emânetim hasebiyle bi’t-tamâm ve’l-kemâl alıp kabz eyledim, min-ba‘d meblağ-ı merkūm on bin dokuz yüz altmış üç akçeden mesfûr Kostantin Nasrânî yedinde ve zimmetinde bir akçe ve bir habbe bâkī kalmayıp husûs-ı mezkûra müte‘allıka mesfûr ile vechen bine’l-vücûh kat‘â da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 11 min-Recebi’l-ferd sene 1143. Şuhûdü’s-sâbıkūn