Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 387 Hüküm no: 314 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Efendi’nin varislerinin terekedeki haklarını almak üzere Mukayyid Mehmed Efendi’nin vasi tayin edildiği Mahmiye-i İstanbul’da Kalenderhâne mahâllesinde sâkin iken bundan akdem vefât eden es-Seyyid Süleyman Efendi b. es-Seyyid Hasan’ın verâseti mahmiye-i mezbûrede Arabacılar mahâllesinde sâkine zevce-i menkûha-i metrûkesi Emine Hatun bt. Mehmed ile vilâyet-i Anadolu’da Şebinkarahisarı’nda sâkine âhar zevce-i menkûha-i metrûkesi Havva Hatun bt. Abdullah ve sulbiye kebîre kızı Âişe’ye ve medîne-i Tokat’da sâkin sulbî kebîr oğlu Mehmed’e münhasıra olduğu şer‘an zâhir ve mukarrer oldukdan sonra mezbûrûn Havva Hatun ve Âişe ve Mehmed’in hisse-i ırsiye-i şer‘iyyelerini ahz u kabz ve zabt u hıfza kıbel-i şer‘den bir vasî ve kayyım nasb lâzım ve mühim olmağın emânet ile ma‘rûf ve istikāmet ile mevsûf ve her vechile vesâyet-i mezbûre uhdesinden gelmeğe kādir idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve mukarrer olan medrese-i mezkûrede sâkin işbu bâ‘isü’l-kitâb Mukayyid Mehmed Efendi b. Süleyman’ı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri mezbûrûn Havva Hatun ve Âişe ve Mehmed’in hisse-i ırsiye-i ma‘lûmelerini ahz u kabz ve zabt u hıfza vasî ve kayyım nasb u ta‘yîn buyurduklarında merhûm Mehmed Efendi dahi ber-vech-i muharrer vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî 7 Receb sene 1143. Şuhûdü’l-hâl: Mustafa Bey b. Ahmed, Halil Efendi b. Ömer, Molla İbrahim b. Mustafa, es-Seyyid Hasan Çelebi b. es-Seyyid Mehmed, Ali Efendi b. Mehmed, Ahmed Çelebi b. Hasan, Mustafa Çelebi b. Safa