Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 387 Hüküm no: 315 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Annan’ın vefat eden Sandalcı İbrahim’den alacağı olduğu Husûs-ı âti’z-zikrin mahâllinde istimâ‘ ve tahrîri için savb-ı şer‘-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Saraç İshak mahâllesinde sâkin iken bundan akdem vefât eden Sandalcı es-Seyyid el-Hâc İbrahim Ağa b. es-Seyyid Abdüsselam’ın Bezzâzistân-ı Cedîd’de vâki‘ mahzenine varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Mîrahor mahâllesinde mütemekkin bâ‘isü’s-sifr Agop v. Annan meclis-i ma‘kūd-ı mezbûrda müteveffâ-yı mezbûrun düyûn-ı müsbetesi olmağla terekesini kabz ve düyûn-ı müsbetesini edâya kıbel-i şer‘den vasî ve kayyım nasb olunmağla terekesine bi’l-vesâye vaz‘-ı yed eden Şeyh Mehmed b. Hasan mahzarında üzerine da‘vâ ve takrîr-i kelâm edip müteveffâ-yı mezbûr Sandalcı es-Seyyid el-Hâc İbrahim Ağa b. es-Seyyid Abdüsselam b. Yusuf zimmetinde levn ve zirâ‘ı beynimizde ma‘lûm yedimden müşterâ ve makbûz sandal semeninden ba‘de-külli’l-hesâb yüz yirmi guruş hakkım olup huzûr-ı Müslimînde hattâ müteveffâ-yı mezbûr hâl-i kemâl-i sıhhatinde fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra bi’l-vesâye vaz‘-ı yedini ikrâr ve müdde‘î-i mesfûrun ber-vech-i mübeyyen müdde‘âsını inkâr edicek, müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Mesihpaşa mahâllesinde sâkin Yakub Ağa b. Ali ve Kazgancı mahâllesinde sâkin es-Seyyid Mehmed Ağa b. es-Seyyid Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Sandalcı es-Seyyid el-Hâc İbrahim Ağa b. es-Seyyid Abdüsselam b. Yusuf hâl-i kemâl-i sıhhatinde fevtinden üç ay mukaddem işbu müdde‘î-i mesfûr Agop zimmîye levn ve zirâ‘ı beynlerinde ma‘lûm yedinden müşterâ ve makbûz sandal semeninden ba‘de-külli’l-hesâb yüz yirmi guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû irsâl olunan Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Es-Seyyid Mehmed Ağa b. es-Seyyid Abdüsselam, es-Seyyid Halil b. es-Seyyid el-Hâc İbrahim, es-Seyyid Mehmed Ağa b. es-Seyyid el-Hâc İbrahim, el-Hâc İbrahim b. Abdurrahman, Hasan b. Mustafa