Bab Mahkemesi 54 Numaralı Sicil (H. 1102 / M. 1691) cilt: 20, sayfa: 99 Hüküm no: 71 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mektûbî Mehmed Efendi’den miras kalan evin büyük hissesinin kızı Emetullah Hatun bt. Mollazâde Mehmed Efendi’ye ait olduğu ve kalan hisseyi de satın aldığı Mahmiye-i İstanbul’da Beyceğiz mahallesinde sâkine Fâtıma Hâtun bt. el-merhûm Mektûbî Mehmed Efendi nâm hâtun zâtını ma‘rifet-i şer‘iyye ile ârifân İbrahim Çelebi b. Abdullah ve el-Hâc Ali b. Mustafa ta‘rîfleriyle mu‘arrefe oldukdan sonra meclis-i şer‘-i şerîf-i enverde, sulbiye kebîre kızı işbu sâhibü’l-kitâb umdetü’l-muhadderât Emetullah Hâtun bt. el-merhûm Mollazâde Mehmed Efendi tarafından zikri âtî iştirâ ve teslîm-i semene vekîl olup, yine mu‘arrifân-ı mezbûrân şehâdetleriyle şer‘an vekâleti sâbite olan zevci Mehmed Efendi b. el-merhûm İbrahim Efendi mahzarında bi tav‘ihâ ikrâr-ı sahîh-i şer‘î ve i‘tirâf-ı sarîh-i mer‘î kılıp, mahalle-i mezbûrede vâki‘ etrâf-ı erba‘ası Minkārîzâde merhûm Şeyhülislâm Yahya Efendi müte’ehhilîn odaları ve ba‘zan Muharremzâde Efendi odaları ve gılmâna meşrûta merhûm Müderris Abdurrahman Efendi menzili ve merhûm Hasan Ağa mülkü ve ba‘zan Şahin odaları ve İbrahim Çelebi mülkü ve tarîk-i hâs ile mahdûd, dâhiliyesi tahtânî üç oda ve bir mutfak ve bir sofa ve önünde zât-ı eşcâr-ı müsmire ve gayr-ı müsmire bahçe ve bi’r-i mâ’ ve kenîf ve hâriciyesi tahtânî oda ve ahır ve kenîf ve sokak kapısı ve avluyu müştemil mülk menzil zevcim mezbûr Mehmed Efendi’nin mülkü olup, ba‘de vefâtihî sümünü bana ve seb‘a-i esmânı kızı müvekkile-i mezbûre Emetullah Hâtun’a bi’l-irsi’ş-şer‘î isâbet ve intikāl etmişdi. El-hâletü hâzihî menzil-i mahdûd-ı mezbûrda olan sümün-i hisse-i mu‘ayyene-i ma‘lûmemi ve yine menzil-i mezbûr dâhilinde İbrahim Çelebi menzili cânibinde vâlidem Ayşe bt. Ahmed nâm Hâtun’a karzan ve redden [ve]irsen bana isâbet eden tûlen ve arzan bi hesâbi terbî‘î elli zirâ‘ mikdârı mülk arsa-i hâliyemi safka-i vâhide ile dâmâdım mezbûr Mehmed Efendi’ye yüz elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi zevcesi müvekkile-i mezbûre Emetullah Hâtun için bi’l-vekâle iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz elli esedî guruşu vekîl-i mesfûr Mehmed Efendi yedinden bi’t-tamâm ve’l-kemâl ahz u kabz ve tesellüm eyledim. Ba‘de’l-yevm menzil-i mahdûd-ı mezkûrda olan hisse-i irsiyem ve arsa-i hâliyemiz mezbûre Emetullah Hâtun’un mülk-i müşterâsı olup, benim kat‘â alâka ve medhalim kalmamışdır, keyfe mâ yeşâ mutasarrıf olsun dedikde, gıbbe’t-tasdîki’l-mu‘teberi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel sene 1102. Şuhûdü’l-hâl: Attâr el-Hâc Mehmed b. Abdullah, Sekkâk Mustafa Çelebi b. Pîrî, Berber Sâlih b. Abdullah, Mehmed Çelebi b. ( ), Şaban b. Muharrem, Ebûbekir Çelebi b. Osman, el-Hâc Mehmed b. Ahmed, Kavukcu Mustafa Çelebi.