Bab Mahkemesi 54 Numaralı Sicil (H. 1102 / M. 1691) cilt: 20, sayfa: 100 Hüküm no: 72 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. Mehmed’in katır davasının reddi Mahmiye-i İstanbul’da dergâ[h]-ı âlî yeniçerilerinin otuz dokuzuncu ağa bölüğünde mahsûs oda yoldaşlarından Hüseyin Beşe b. Mehmed nâm kimesne meclis-i şer‘-i şerîf-i enverde, bâ‘isü hâze’l-kitâb Mehmed Çavuş b. Ali mahzarında üzerine da‘vâ ve takrîr-i kelâm edip, işbu meclisde mevcûd ve müşâhed olan beyaz nallı katır mülküm olup, târih-i kitâbdan bir sene mukaddem zâyi‘ olmuşdu. Hâlâ mezbûr Mehmed Çavuş bi gayri hakkın vaz‘[-ı yed] edip suâl olunup kasr-ı yedine ve bana teslîme tenbîh olunmak matlûbumdur dedikde, gıbbe’s-suâl mezbûr Mehmed Çavuş cevâbında, mârru’z-zikr katırı Mustafa b. el-Hâc Ali nâm kimesneden on sekiz guruş semen-i medfû‘a iştirâ edip mülk-i müşterâsı olmağla vaz‘-ı yed ederim, müdde‘î-i mezbûrun mülkü olduğu ma‘lûmum değildir deyicek, gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip, yemîn dahi vermemeğin müdde‘î-i mezbûr Hüseyin Beşe bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel sene 1102. Şuhûdü’l-hâl: İbrahim Çelebi b. Mehmed, Ali Çelebi b. Bâli, Mustafa Çelebi b. Şaban, Nasuh b. Osman, el-Hâc Ali b. Abdullah.