Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 388 Hüküm no: 316 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Çelebi’nin oğlu Mehmed’in üzerine Ümmügülsüm Hatun’un vasi tayin edildiği Mahmiye-i İstanbul’da Bâyezid-i Cedîd mahâllesinde sâkin iken bundan akdem vefât eden Miskci Ahmed Çelebi b. Mustafa’nın sulbî sagīr oğlu Mehmed’in min-kıbeli’l-eb ceddesi ve vasiyy-i mansûbesi Âişe Hatun bt. Mehmed umûr-ı vesâyeti ikāmetden ihzâr-ı acz ve vesâyetden kasr-ı yed etmekle azlolunup sagīr-i mezbûrun tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu bâ‘isetü’l-kitâb Ümmügülsüm Hatun bt. Mehmed’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri vasiyy-i ma‘zûlün yedinde sagīr-i merkūm Mehmed’in vakt-i rüşd [ü] sedâdına varınca tesviye-i umûruna vasî nasb u ta‘yîn buyurduklarında ol dahi ber-vech-i muharrer vesâyet-i mezkûreyi [71a] kabûl ve merâsimini kemâ-yenbağī edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî-gurreti Recebi’l-ferd li-sene selâse ve erba‘în ve mi’e ve elf. Şuhûdü’l-hâl: İbrahim Halîfe b. Ali, Mehmed Çelebi b. İbrahim, Ali Beşe b. Mehmed, Osman Çelebi b. Halil, Ömer b. Halil, İbrahim Efendi b. Mehmed