Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 389 Hüküm no: 317 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden kocası İshak Ağa’nın terekesinden mehir alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden fahrü’l-müderrisîni’l-kirâm Mektûbî Mehmed Emin Efendi irsâl olunup ol dahi mahmiye-i İstanbul’da Kumkapı kurbünde Nişâncıpaşa-i Atik mahâllesi ahâlîsinden iken bundan akdem vefât eden Dergâh-ı âlî kapıcıbaşılarından İshak Ağa b. Ali b. İshak’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı Ahmed Ağa b. el-Hâc Derviş ve Mustafa Çelebi b. Ahmed ta‘rîfleriyle mu‘arrefe olan bâ‘isetü’l-kitâb Âişe Hatun bt. Mehmed meclis-i ma‘kūd-ı mezkûrda müteveffâ-yı mezbûrun vâlidesi olmağla terekesine bi’l-verâse vâzı‘atü’l-yed ve zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarında üzerine da‘vâ ve takrîr-i kelâm edip zevcim müteveffâ-yı mezbûr İshak Ağa b. Ali b. İshak zimmetinde mütekarrer ve ma‘kūdün-aleyh elli bir bin akçe mehr-i müeccel hakkım olup hattâ müteveffâ-yı mezbûr hâl-i kemâl-i sıhhatinde târîh-i kitâbdan üç sene mukaddem zimmetinde bana ol kadar akçe mehr-i müeccel deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl [olunup] alıverilmek matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Mustafa Çelebi b. Ahmed ve Mehmed Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İshak Ağa b. Ali b. İshak hâl-i kemâl-i sıhhatinde târîh-i kitâbdan üç sene mukaddem zevcesi işbu müdde‘iye-i mezbûre Âişe Hatun’a zimmetinde mütekarrer ve ma‘kūdün-aleyh elli bir bin akçe mehr-i müeccel vâcibü’l-edâ deyni olduğunu huzûr-ı Müslimînde ikrâr ve işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel Hüseyin Çelebi b. Mehmed ve Ahmed Çelebi b. İsmail ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 13 min-Receb sene 1143. Şuhûdü’l-hâl: Ali Çavuş b. Mehmed, İbrahim Çelebi b. Abdullah, Mehmed Çelebi b. Abdullah, Ömer Çelebi b. Mustafa, Abdurrahman Çelebi b. Mehmed, Hüseyin Çelebi b. Mehmed