Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 390 Hüküm no: 318 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden İshak Ağa’da elmas yüzük ücretinden alacağı olduğu Kezâlik akd-i meclis-i şer‘-i şerîf ettikde mahmiye-i mezbûrede İnebey mahâllesinde sâkin bâ‘isü’l-kitâb Ahmed Ağa b. el-Hâc Derviş meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Abdülkadir ve sulbiye sagīre kızı Saliha’nın vâlideleri ve tesviye-i emrlerine vasiyye-i mansûbeleri olmağla terekesine bi’l-verâse ve bi’l-vesâye vâzı‘atü’l-yed olan Âişe Hatun bt. Mehmed b. Abdullah tarafından husûs-ı âti’l-beyana vekîl-i müsecceli Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarlarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde yedimden müşterâ ve makbûz bir elmas yüzük bahasından dört yüz guruş zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûre Nahılbend mahâllesinde sâkin İbrahim Efendi b. Hasan ve müteveffâ-yı mezbûrun etbâ‘ından Mustafa Çelebi b. Ahmed meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr İshak Ağa b. Ali b. İshak hâl-i kemâl-i sıhhatinde fevtinden üç sene mukaddem işbu müdde‘î-i mezbûr Ahmed Ağa’ya yedinden müşterâ ve makbûz bir elmas yüzük bahasından dört yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn