Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 390 Hüküm no: 319 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağlıkçı Ebubekir’in vefat eden İshak Ağa’da alacağı olduğu Kezâlik akd-i meclis-i şer‘-i şerîf ettikde mahmiye-i mezbûrede Şeyh Ebulvefâ mahâllesinde sâkin bâ‘isü’l-kitâb Yağlıkçı el-Hâc Ebubekir b. el-Hâc Mustafa meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Abdülkadir’in ve sulbiye sagīre kızı Saliha’nın tesviye-i umûruna vasiyye-i mansûbeleri olmağla terekesine bi’l-verâse ve bi’l-vesâye vâzı‘atü’l-yed olan Âişe Hatun bt. Mehmed b. Abdullah tarafından husûs-ı âti’l-beyana vekîl-i müsecceli Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarlarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde yedimden müşterâ ve makbûz ecnâsı beynimizde ma‘lûm yağlıkçı emti‘ası bahasından ba‘de-külli’l-hesâb beş yüz elli yedi buçuk guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden dört ay mukaddem meblağ-ı mezbûr cihet-i mezkûreden zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Hobyar mahâllesinde sâkin Ahmed Çelebi b. Mustafa ve Kasab İlyas mahâllesinde sâkin İsmail Çelebi b. Abdullah li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka [71b] müteveffâ-yı mezbûr İshak Ağa b. Ali b. İshak hâl-i kemâl-i sıhhatinde fevtinden dört ay mukaddem işbu müdde‘î-i mezbûr Yağlıkçı el-Hâc Ebubekir’e yedinden müşterâ ve makbûz ecnâsı beynlerinde ma‘lûm yağlıkçı emti‘asından ba‘de-külli’l-hesâb beş yüz elli yedi buçuk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn