Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 391 Hüküm no: 320 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın vefatından önce büyük oğlu Mustafa Paşa’yı çocukları üzerine vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ Sadi Ali Efendi irsâl olunup ol dahi mahmiye-i İstanbul’da Sultân Bâyezid-i Veli Câmi‘-i şerîfi kurbünde Yahnikapan mahâllesi ahâlîsinden olmağla medîne-i Trabzon vâlisi olup gider iken esnâ-i tarîkde vilâyet-i Anadolu’da Bozok kazâsında bundan akdem vedâ‘-ı âlem-i fânî eden merhûm es-Seyyid İbrahim Paşa b. Abdullah’ın mahâlle-i mezbûrede vâki‘ menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde merhûm-ı mûmâ-ileyhin sulbî kebîr oğlu umdetü’l-ümerâi’l-kirâm işbu sâhibü’l-kitâb es-Seyyid Mustafa Paşa meclis-i ma‘kūd-ı mezkûrda merhûm-ı mezbûrun sulbî sagīr oğulları es-Seyyid Halil Bey ve es-Seyyid Ali Bey ve sulbiye sagīre kızları Şerîfe Rahime Hanım ve Şerîfe Kerime Hanım tashîhan li’d-da‘vâ vasî nasb olunan fahrü’l-akrân es-Seyyid Fazlullah Ağa b. İbrahim mahzarında üzerine da‘vâ ve takrîr-i kelâm edip babam merhûm-ı mezbûr es-Seyyid İbrahim Paşa b. Abdurrahman b. Abdullah hayâtında fevtinden on gün mukaddem medîne-i Trabzon’a gider iken esnâ-i tarîkde Aksaray kasabasında bi-emrillâhi te‘âlâ vefât eylediğimde evlâd-ı sıgārım mezbûrûn es-Seyyid Halil Bey ve es-Seyyid Ali Bey ve Şerîfe Rahime Hanım ve Şerîfe Kerime Hanım’ın mâllarını zabt u hıfza ve vakt-i rüşd ü sedâdlarına varınca tesviye-i emrlerine huzûr-ı Müslimînde beni vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırran-aleyhâ vefât ettikde tenfîz-i vesâyâ murâd eylediğimde mezbûr es-Seyyid Fazl[ullah] Ağa mâni‘ olur, suâl olunsun dedikde gıbbe’s-suâl ve’l-inkâr müdde‘î-i mûmâ-ileyhden müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Mehter Ali Ağa b. Hasan ve Mehmed Ağa b. Süleyman li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr es-Seyyid İbrahim Paşa b. Abdurrahman b. Abdullah hayâtında medîne-i Trabzon’a gider iken esnâ-i tarîkde Aksaray kasabasında fevtinden on gün mukaddem bi-emrillâhi te‘âlâ vefât eylediğimde evlâd-ı sıgārım es-Seyyid Halil Bey ve es-Seyyid Ali Bey ve Şerîfe Kerime Hanım ve Şerîfe Rahime Hanım’ın mâllarını zabt u hıfza ve vakt-i rüşd ü sedâdlarına varınca tesviye-i emrlerine oğlu işbu müdde‘î-i mûmâ-ileyh es-Seyyid Mustafa Paşa’yı huzûrumuzda vasiyy-i muhtâr nasb u ta‘yîn edip ol dahi muvâcehesinde ber-vech-i muharrer vesâyet-i mezbûreyi ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel Ali Çelebi b. İbrahim ve Hasan b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 22 min-Receb sene 1143. Şuhûdü’l-hâl: Durak Bey b. İbrahim, İsmail Bey b. İbrahim, es-Seyyid Mehmed Ağa b. es-Seyyid Abdurrahman, Abdullah Çelebi b. Ahmed, Mehmed Ağa b. Mustafa, Ali Çelebi b. İbrahim