Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 393 Hüküm no: 322 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Karaca’nın vefat eden Salih Efendi’de alacağı olduğu Kezâlik akd-i meclis-i şer‘-i şerîf ettikde mahmiye-i mezbûrede Gül Câmi‘-i şerîfi mahâllesinde mütemekkin bakkāl tâifesinden bâ‘isü’s-sifr Karaca v. Yani nâm zimmî meclis-i ma‘kūd-ı mezkûrda vasiyy-i mezbûr Hazînedâr Ahmed Efendi b. Hüseyin mahzarında üzerine da‘vâ ve takrîr-i kelâm edip merhûm-ı mezbûr Salih Efendi b. Muharrem zimmetinde işbu yedimde olan bin yüz otuz dokuz senesi şehr-i Rebî‘ülûlâ gurresi târîhiyle müverrah mu‘anven ve mersûm temessük mûcebince ecnâsı beynimizde ma‘lûm yedimden müşterâ ve makbûz zehâir-i mütenevvi‘a bahasından ba‘de-külli’l-hesâb altı yüz elli dört guruş hakkım olup hattâ merhûm-ı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden sâbıkā Erzurum kādısı olan Ahmed Efendi b. eş-Şeyh Mehmed ve mârrü’z-zikr Fâtıma Sultân mahâllesinde sâkin el-Hâc Mahmud Ağa b. Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr Salih Efendi b. Muharrem hâl-i kemâl-i sıhhatinde işbu müdde‘î-i mesfûr bakkāl Karaca zimmîye yedinde olan bin yüz otuz dokuz senesi şehr-i Rebî‘ülûlâ gurresi târîhiyle müverrah mu‘anven ve mersûm temessük mûcebince ecnâsı beynlerinde ma‘lûm yedinden müşterâ ve makbûz zehâir-i mütenevvi‘a bahasından ba‘de-külli’l-hesâb altı yüz elli dört guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, ilâ-[âhirihî] gıbbe’t-tahlîfi’l-mu‘teber mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şuhûdûnü’s-sâbıkūn