Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 394 Hüküm no: 323 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi ve Acem Ayvaz’ın vefat eden Salih Efendi’de bez ücretinden alacakları olduğu Kezâlik akd-i meclis-i şer‘-i şerîf ettikde mahmiye-i mezbûrede Kebeciler Hanı tüccârından bâ‘isü’l-kitâb es-Seyyid Hüseyin Çelebi b. Ali meclis-i ma‘kūd-ı mezkûrda vasiyy-i mezbûr Hazînedâr Ahmed Efendi b. Hüseyin mahzarında üzerine da‘vâ ve takrîr-i kelâm edip merhûm-ı mezbûr Salih Efendi b. Muharrem zimmetinde yedimden müşterâ ve makbûz ma‘lûmü’l-aded elvan bez semenlerinden bâkī yirmi altı buçuk guruş hakkım olup hattâ merhûm-ı mezbûr Salih Efendi hayâtında meblağ-ı mezkûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, suâl olunsun dedikde gıbbe’s-suâl ve’l-inkâr Acem Ayvaz v. Bogodiç meclis-i ma‘kūd-ı mezkûrda vasiyy-i mezbûr mahzarında üzerine kezâlik da‘vâ ve takrîr-i kelâm edip merhûm-ı mûmâ-ileyh Salih Efendi b. Muharrem zimmetinde yedimde olan mümzâ ve mahtûm deyn temessükü mûcebince yedimden müşterâ ve makbûz ma‘lûmü’l-aded ve’l-ecnâs alaca ve şâlî semenlerinden bâkī seksen dört guruş hakkım olup hattâ merhûm-ı mûmâ-ileyh meblağ-ı mezkûr cihet-i merkūmeden zimmetinde vâcibü’l-edâ bana deyni olduğunu huzûr-ı Müslimînde hayâtında ikrâr ve işhâd edip kable’l-edâ fevt olmağla terekesinden taleb ederim, vasiyy-i mezbûra suâl olunsun dedikde gıbbe’s-suâl ve’l-inkâr müdde‘iyân-ı mezbûrândan müdde‘âlarına beyyine taleb olundukda udûl-i ahrâr-ı ricâl-i Müslimînden merhûm-ı mûmâ-ileyhin sulbî kebîr oğlu Mehmed Emin Efendi ve etbâ‘ından Mustafa Çelebi b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mûmâ-ileyh Salih Efendi b. Muharrem hayâtında işbu müdde‘î-i mezbûr es-Seyyid Hüseyin Çelebi’ye yedinden müşterâ ve makbûz ma‘lûmü’l-aded ve elvan bez semenlerinden bâkī yirmi altı buçuk guruş ve müdde‘î-i mesfûr Acem Ayvaz’a yedinde olan mümzâ ve mahtûm deyn temessükü mûcebince yedinden müşterâ ve makbûz ma‘lûmü’l-aded ve’l-ecnâs alaca ve şâlî semenelerinden bâkī seksen dört guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, ilâ-âhırihî, müdde‘iyân-ı mezbûrândan her biri vech-i şer‘î üzere tahlîf olunup mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şuhûdûnü’s-sâbıkūn