Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 395 Hüküm no: 324 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Osman Ağa’nın vefat eden Salih Efendi’de alacağı olduğu Kezâlik akd-i meclis-i şer‘-i şerîf ettikde medîne-i Hazret-i Ebî Eyyûb Ensârî -radıye anhü Rabbihi’l-bârî- mahâllâtından Koca Kasım Paşa mahâllesi ahâlîsinden Kasab el-Hâc Hüseyin b. el-Hâc Mehmed b. el-Hâc Hüseyin tarafından husûs-ı âti’l-beyanda vekîl olduğu Ahmed Efendi b. Mehmed ve Musa Çelebi b. Hüseyin şehâdetleriyle mahzar-ı hasm-ı câhidde sâbit ve sübût-ı vekâletine hükm olunan işbu bâ‘isü’l-kitâb Kasab Osman Ağa b. Ahmed meclis-i şer‘-i şerîf-i enverde vasiyy-i mezbûr Hazînedâr Ahmed Efendi b. Hüseyin mahzarında bi’l-vekâle üzerine da‘vâ ve takrîr-i kelâm edip merhûm-ı mûmâ-ileyh Salih Efendi b. Muharrem zimmetinde yedimde olan bin yüz kırk bir senesi evâhir-i Zilhicce târîhiyle müverrah mümzâ ve mahtûm işbu deyn temessükü mûcebince müvekkilim mezbûr Kasab el-Hâc Hüseyin b. el-Hâc Mehmed b. el-Hâc Hüseyin’in vezn ve kıymeti beynlerinde ma‘lûm yedinden müşterâ ve makbûz lahm semeninden dört yüz guruş hakkı olup hattâ merhûm-ı [mûmâ]-ileyh hayâtında meblağ-ı mezkûr cihet-i merkūmeden zimmetinde müvekkilim mezbûra vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, vasiyy-i merkūma suâl olunsun dedikde gıbbe’s-suâl ve’l-inkâr mezbûr Kasab Osman Ağa meclis-i ma‘kūd-ı mezkûrda vasiyy-i mezbûr mahzarında bi’l-asâle üzerine da‘vâ ve takrîr-i kelâm [72b] [edip] merhûm-ı mûmâ-ileyh Salih Efendi b. Muharrem zimmetinde yedinden müşterâ ve makbûz ma‘lûmü’l-vezn ve’l-mikdâr lahm semeninden ba‘de-külli’l-hesâb yetmiş dokuz buçuk guruş on para hakkım olup hattâ merhûm-ı mûmâ-ileyh hayâtında meblağ-ı mezkûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, vasiyy-i mezbûra suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âlarına beyyine taleb olundukda udûl-i ahrâr-ı ricâl-i Müslimînden sâbıkā Erzurum kādısı olan Ahmed Efendi b. eş-Şeyh Mehmed ve merhûm-ı mezbûrun sulbî oğlu Mehmed Emin Efendi li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka merhûm-ı mûmâ-ileyh Salih Efendi b. Muharrem hayâtında işbu müdde‘î-i mezbûrun müvekkili mezbûr Kasab el-Hâc Hüseyin b. el-Hâc Mehmed b. el-Hâc Hüseyin’e yedinde olan bin yüz kırk bir senesi evâhir-i Zilhicce târîhiyle müverrah mümzâ ve mahtûm deyn [temessükü] mûcebince vezn ve kıymeti beynlerinde ma‘lûm yedinden müşterâ ve makbûz lahm semeninden dört yüz guruş ve müdde‘î-i mezbûr Kasab Osman Ağa’ya yedimden müşterâ ve makbûz ma‘lûmü’l-vezn ve’l-mikdâr lahm semeninden ba‘de-külli’l-hesâb yetmiş dokuz buçuk on para zimmetinde vâcibü’l-edâ deyni olduğunu huzûrda ikrâr ve bizi işhâd eyledi, ilâ-âhırihî şehâdetleri makbûle olmağın mevkūfen alâ-yemîni’l-müvekkili’l-mezbûr ve müdde‘î-i mezbûr Osman Ağa’ya vech-i şer‘î üzere tahlîf olunup mûcebiyle ba‘de’l-hükm. Fi’t-târîhi’l-mez[bûr] li-seneti’l-merkūme. Eş-şuhûdûnü’s-sâbıkūn