Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 396 Hüküm no: 325 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abram v. Asfader’in vefat eden Salih Efendi’de alacağı olduğu Kezâlik akd-i meclis-i şer‘-i şerîf ettikde işbu bâ‘isü’s-sifr Abram v. Asfader meclis-i ma‘kūd-ı mezkûrda vasiyy-i mezbûr Hazînedâ[r] Ahmed Efendi b. Hüseyin mahzarında üzerine da‘vâ ve takrîr-i kelâm edip merhûm-ı mezbûr Salih Efendi b. Muharrem zimmetinde yedimden müşterâ ve makbûz eşyâ-i ma‘lûme bahasından bâkī yüz dört guruş hakkım olup hattâ müteveffâ-yı mezbûr hayâtında meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun hayâtında kethüdâsı Mehmed Efendi b. Mustafa ve Yorganî Mustafa Çelebi b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr Salih Efendi b. Muharrem hayâtında işbu müdde‘î-i mesfûra yedinden müşterâ ve makbûz eşyâ-i ma‘lûme bahasından bâkī yüz dört guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa ilâ-âhırihî gıbbe’t-tahlîfi’l-mu‘teber mûcebiyle ba‘de’l-hükm. Fî 8 min-Recebi’l-ferd sene 1143. Şuhûdü’l-hâl: Veliyüddin Ağa b. Hüseyin, Yorganî el-Hâc Mustafa b. Ömer, Mustafa Çelebi b. Ali, Süleyman Çelebi b. Ahmed, el-Hâc Süleyman b. Süleyman, Ahmed b. İsmail