Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 397 Hüküm no: 326 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki Ağa’nın vefat eden Salih Efendi’de alacağı olduğu Kezâlik akd-i meclis-i şer‘-i şerîf ettikde mahmiye-i mezbûrede Piştahta-i sagīr kurbünde Alipaşa-i atik mahâllesi sâkinlerinden bâ‘isü’l-kitâb es-Seyyid Abdülbaki Ağa b. es-Seyyid Taha meclis-i ma‘kūd-ı mezkûrda vasiyy-i mezbûr Hazînedâr Ahmed Efendi b. Hüseyin mahzarında üzerine da‘vâ ve takrîr-i kelâm edip merhûm-ı mûmâ-ileyh Salih Efendi b. Muharrem zimmetinde yedinde olan bin yüz otuz altı senesi Zilka‘desi evâsıtı târîhiyle müverrah mümzâ ve mahtûm deyn temessükü mûcebince cihet-i karzdan dört yüz kırk guruş hakkım olup hattâ merhûm-ı mûmâ-ileyh hayâtında meblağ-ı mezkûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip meblağ-ı mezkûrun yüz on dört guruşunu merhûm-ı mûmâ-ileyhin hayâtında ahz ü istîfâ edip bâkī üç yüz yirmi altı guruşu kable’l-edâ merhûm olmağla terekesinden taleb ederim, suâl [olunsun] dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun sulbî kebîr oğlu Mehmed Emin Efendi ve kethüdâsı el-Hâc Mehmed b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mûmâ-ileyh Salih Efendi b. Muharrem hayâtında işbu müdde‘î-i mezbûr es-Seyyid Abdülbaki b. es-Seyyid Taha’ya yedinde olan bin yüz otuz altı senesi Zilka‘desi evâsıtı târîhiyle müverrah mümzâ ve mahtûm deyn temessükü mûcebince cihet-i karzdan dört yüz kırk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra kabzını mu‘terif olduğu yüz on dört guruşdan bâkī üç yüz yirmi altı guruşu merhûm-ı merkūmun hayâtında küllen ve ba‘zan ahz ü istîfâ veyâ hibe veyâ âhara havâle etmeyip ve mukābelesinde rehn dahi almayıp taraf-ı şer‘îden bir tarîk ile merhûm-ı mezbûrun zimmetini ibrâ etmediğine müdde‘î-i mezbûra yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn