Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 397 Hüküm no: 327 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin vefat eden Salih Efendi’de alacağı olduğu Kezâlik akd-i meclis-i şer‘-i şerîf ettikde merhûm-ı mezbûrun hayâtında hazînedârı Ahmed Efendi b. Hüseyin meclis-i ma‘kūd-ı mezkûrda merhûm-ı mezbûrun tesviye-i umûruna tas[hî]han li’d-da‘vâ vasî nasb olunan Kethüdâ el-Hâc Mehmed Efendi b. Mustafa mahzarında üzerine da‘vâ ve takrîr-i kelâm edip merhûm-ı mûmâ-ileyh Salih Efendi b. Muharrem zimmetinde yedimde olan bin yüz kırk iki senesi şehr-i Rebî‘ülevvel târîhiyle müverrah mümzâ ve mahtûm temessük mûcebince yedinden müşterâ ve makbûz eşyâ-i ma‘lûme semeninden bâkī altı yüz yedi guruş hakkım olup hattâ merhûm-ı mûmâ-ileyh hayâtında meblağ-ı bâkī-i mezkûr cihet-i mezkûreden bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ merhûm olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mûmâ-ileyhin hayâtında etbâ‘ından Yorganî Mustafa Çelebi b. Ali ve Kahveci Ahmed b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr Salih Efendi b. Muharrem hayâtında hazînedârı işbu müdde‘î-i mezbûr Ahmed Efendi’ye yedinde olan bin yüz kırk iki şehr-i Rebî‘ülevvel târîhiyle müverrah mümzâ ve mahtûm temessük mûcebince yedinden müşterâ ve makbûz eşyâ-i ma‘lûme semeninden bâkī altı yüz yedi guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere ilâ-âhırihî gıbbe’t-tahlîfi’ş-şer‘î mûcebiyle ba‘de’l-hükm. Fi’t-târîhi’l-mezbûr li-seneti’l-merkūme. Eş-şâhidûnü’s-sâbıkūn