Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 398 Hüküm no: 328 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İshak Ağa’nın Sarraf Agob’a borcu olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ İbrahim Efendi irsâl olunup ol dahi mahmiye-i İstanbul’da Kumkapı kurbünde Nişâncıpaşa-i Atik mahâllesi ahâlîsinden iken bundan akdem vefât eden Dergâh-ı âlî kapıcıbaşılarından İshak Ağa b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf [ettikde] müteveffâ-yı mezbûrun zevce-i menkûha-i metrûkesi ve sulbî sagīr oğlu Abdülkadir ve sulbiye sagīre kızı Saliha’nın tesviye-i emrlerine cânib-i şer‘den mansûbe vasîleri olmağla terekesine bi’l-verâse ve bi’l-vesâye vâzı‘atü’l-yed olan Âişe Hatun bt. Abdullah tarafından husûs-ı âti’l-beyanda vekîl-i müsecceli Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Lütfullah mahzarlarında üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak zimmetinde işbu yedimde olan târîh-i kitâb senesi Saferi’l-hayrın beşinci günü târîhiyle müverrah memhûr temessük mantûkunca cihet-i karz-ı şer‘îden bin guruş hakkım olup hattâ müteveffâ-yı [mezbûr] hâl-i kemâl-i sıhhatinde târîh-i mezkûrda meblağ-ı merkūm cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd ettikden sonra meblağ-ı mezbûrun üç yüz dokuz buçuk guruşunu hayâtında havâle ettiği Mehmed Kethüdâ yedinden ahz u kabz edip zimmetinde altı yüz doksan buçuk guruş hakkım bâkī kalıp kable’l-edâ fevt olmağla terekesinden taleb ederim, suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mersûmdan ber-vech-i muharrer müdde‘âsına beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrun etbâ‘ından Hüseyin Çelebi b. İsmail ve Mustafa Çelebi b. Ahmed ve İbrahim Çelebi b. Musa ve Soğanağa mahâllesinde sâkin el-Hâc Abdullah b. Halil li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İshak b. Ali b. İshak hâl-i kemâl-i sıhhatinde işbu müdde‘î-i mersûm Sarrâf Agop zimmîye cihet-i karz-ı şer‘îden bin guruş zimmetinde vâcibü’l-edâ deyni olduğunu huzûr-ı Müslimînde ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra kabzını mu‘terif olduğu üç yüz dokuz buçuk guruşdan mâ‘adâ altı yüz doksan buçuk guruşu dahi küllen ve ba‘zan ahz ü istîfâ veyâ hibe veyâ âhara havâle etmeyip ve mukābelesinde rehin almayıp taraf-ı şer‘îden bir tarîk ile müteveffâ-yı mezbûrun zimmetini ibrâ etmediğinde müdde‘î-i merkūm Sarrâf Agop’a yemîn teklîf olundukda ol dahi gıbbe’l-mesûl yemîn billâhillezî enzele’l-İncîle alâ-İsa -aleyhi’s-selâm- etmeğin mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an irsâl olunan Hüseyin Çelebi b. Mehmed ve Ahmed Çelebi b. İsmail ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 3 min-Recebi’l-ferd sene 1143. Şuhûdü’l-hâl: el-Hâc İbrahim Beşe b. Hasan, Süleyman Efendi b. Mehmed, Ali Çavuş b. Mehmed, Mustafa Çelebi b. Ahmed, Süleyman Ağa b. Mustafa, İbrahim Çelebi b. Abdullah, Ömer Çelebi b. Mustafa, Abdurrahim Çelebi b. Mehmed, Lütfullah Çelebi b. Abdurrahim, Hüseyin Beşe b. Mehmed