Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 399 Hüküm no: 329 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacer Hatun’un vefat eden Ayşe Hatun’dan alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden Mevlânâ Hacı İbrahim Efendi irsâl olunup ol dahi mahmiye-i İstanbul’da Hoca Üveys mahâllesinde sâkine iken bundan akdem vefât eden Âişe Hatun bt. Ahmed Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Aksaray kurbünde sâkine olup zâtı ta‘rîf-i şer‘î ile mu‘arrefe olan bâ‘isetü’l-kitâb Hacer Hatun bt. Bayram meclis-i ma‘kūd-ı mezbûrda müteveffât-ı mezbûrenin vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed edip zâtı ta‘rîf-i şer‘î ile mu‘arrefe olan Hanife Hatun bt. el-merhûm Rasul Efendi mahzarında üzerine da‘vâ ve takrîr-i kelâm edip müteveffât-ı mezbûre Âişe Hatun bt. Ahmed Efendi b. Abdullah zimmetinde işbu yedimde olan temessük mûcebince karz-ı şer‘îden iki yüz elli guruş hakkım olup hattâ müteveffât-ı mezbûre hâl-i kemâl-i sıhhatinde fevtinden altı ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Salih Çelebi b. el-Hâc Ali ve nisâ-i sâlihâtdan Rukıye Hatun bt. Musa ve Fâtıma Hatun bt. Ebubekir li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Âişe Hatun bt. Ahmed Efendi b. Abdullah hâl-i kemâl-i sıhhatinde fevtinden altı ay mukaddem işbu müdde‘iye-i mezbûre Hacer Hatun yedinde olan temessük mûcebince cihet-i karz-ı şer‘îden iki yüz elli guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel Hasan b. Mustafa ve Salih b. Halil ile. Fî 20 min-Recebi’l-ferd sene [11]43. Şuhûdü’l-hâl: Ahmed b. Abdullah, Mustafa Ağa b. Abdullah, Abdi Çelebi b. Mehmed, İsmail Efendi b. Mehmed, Hacı Hüseyin b. Nasuh, Ahmed b. Mehmed