Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 400 Hüküm no: 330 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vasiyetini yerine getirmek üzere Hanife Hatun’u vasi tayin ettiği Kezâlik akd-i meclis-i şer‘-i şerîf ettikde <> müteveffât-ı merkūmenin ber-vech-i âtî vasiyy-i muhtârı olduğunu iddi‘â eden zâtı ta‘rîf-i şer‘î ile mu‘arrefe olan bâ‘isetü’l-kitâb Hanife Hatun bt. el-merhûm Rasul Efendi meclis-i ma‘kūd-ı mezbûrda müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede bi’l-fi‘il beytülmalı’l-hâs emîni olup terekesine bi’l-emâne vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. Hacı Ahmed mahzarında üzerine da‘vâ ve takrîr-i kelâm edip müteveffât-ı mezbûre Âişe Hatun bt. Ahmed Efendi b. Abdullah hâl-i kemâl-i sıhhatinde fevtinden bir buçuk sene mukaddem bi-emrillâhi te‘âlâ [fevt] eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī terekemin sülüsü ifrâz olunup sülüs-i mezbûrdan elli guruş ıskāt-ı salâtım için fukarâya tasadduk oluna ve kadr-ı ma‘rûf meblağ ile iki kıt‘a mushaf-ı şerîf alınıp birer müstahakka verile ve kadr-ı ma‘rûf meblağ ile eyyâm-ı mübârekede tab‘-ı ta‘âm ve it‘âm-ı fukarâya tasadduk oluna ve sülüs-i mezbûrdan fazla kalırsa vücûh-ı bir ve hayra harc u sarf oluna ve sülüsân terekem vilâyet-i Rumeli’nde Manastır kasabasında sâkine li-ebeveyn ammim ve usûbet-i nesebiye cihetinden vârisim Mehmed Efendi’ye îsâl oluna deyü vasiyet edip tenfîzine huzûr-ı Müslimînde vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırraten-aleyhâ fevt olmağın ber-vech-i tahrîr tenfîz-i vesâyâ murâd eylediğimde emîn-i mûmâ-ileyh mâni‘ olur suâl olunsun dedikde gıbbe’s-suâl ve’l-inkâr müdde‘iye-i merkūmeden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Fenâî Dede mahâllesinde sâkine Mehmed Çelebi b. Osman ve mahâlle-i mezbûrede sâkine nisâ-i sâlihâtdan Rukıye Hatun bt. Mustafa ve Emetullah Hatun bt. Yusuf li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Âişe Hatun bt. Ahmed Efendi b. Abdullah hâl-i kemâl-i sıhhatinde fevtinden bir buçuk sene mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī terekemin sülüsü ifrâz, sülüs-i mezbûrdan elli guruş ıskāt-ı salâtım için fukarâya tasadduk oluna ve kadr-ı ma‘rûf meblağ ile iki kıt‘a mushaf-ı şerîf alınıp birer müstahakka verile ve kadr-ı ma‘rûf meblağ ile eyyâm-ı mübârekede tab‘-ı ta‘âm ve it‘âm-ı fukarâ oluna ve sülüs-i mezbûrdan fazla kalırsa vücûh-ı bir ve hayra harc u sarf oluna ve sülüsân-ı terekem vilâyet-i Rumeli’nde Manastır kasabasında sâkine li-ebeveyn ammim Mehmed Efendi’ye verile deyü vasiyet edip tenfîzine işbu müdde‘iye-i mersûme Hanife Hatun’u huzûrumuzda vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırraten-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli. Fi’t-târîhi’l-mezbûr li’s-seneti’l-merkūme. Şuhûdü’s-sâbıkūn