Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 408 Hüküm no: 337 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Efendi’nin Şevki Hüseyin Efendi’nin terekesinden alacağı konusundaki davasında sulh olduğu Mahmiye-i İstanbul’da Kirmasti mahâllesinde sâkin iken bundan akdem vefât eden Ali Efendi b. el-Hâc Hüseyin b. Abdullah’ın veresesinden sulbî kebîr oğlu İbrahim Efendi mahmiye-i İstanbul’da meclis-i şer‘-i hatîr-i lâzimü’t-tevkīrde Şeyh Resmi mahâllesi ahâlîsinden olup bundan akdem fevt olan müderrisînden Şevki Hüseyin Efendi b. Mehmed’in sulbî kebîr oğlu işbu bâ‘isü’l-kitâb Feyzullah Efendi mahzarında takrîr-i kelâm ve ta‘bîr ani’l-merâm edip benim hâl-i sıgārımda babam müteveffâ-yı mezbûr Ali Efendi’nin terekesinden hisse-i ırsiyeme isâbet eden üç yüz seksen guruş ile li-ebeveyn karındaşım Yahya’nın terekesinden hisse-i ırsiyeme isâbet eden iki yüz on guruş ki min-haysü’l-mecmû‘ müteveffiyân-ı mezbûrândan müntakil hisse-i ırsiyem olan beş yüz doksan guruşu müteveffâ-yı mezbûr Şevki Hüseyin Efendi hayâtında tesviye-i umûruma vesâyeti hasebiyle ahz u kabz edip masârıfına sarfla istihlâk etmeğin meblağ-ı mezbûr terekesinden bana edâ olunmak üzere veresesinden taleb eylediğimde beynimize muslihûn tavassut edip da‘vâ-i mezkûrem mukābelesinde terekesinden bana yüz yirmi beş guruş verilmek üzere oğlu mezbûr Feyz[ullah] Efendi iltimâsıyla inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr [yüz] yirmi beş guruşu terekesinden olmak üzere oğlu mezbûr Feyz[ullah] Efendi’nin yedinden tamâmen ahz u kabz ettiğimden sonra müteveffâ-yı mezbûr Şevki Hüseyin Efendi’nin oğlu mezbûr Feyzullah Efendi ile verese-i sâiresi olan zevcesi Fâtıma Hatun ve sulbiyeleri olan kebîre Emetullah ile sagīre Zeyneb’den her birinin zimmetlerini mâ‘adâya müte‘allıka âmme-i da‘vâ ve mutâlebâtdan ibrâ-i âm ile ibrâ ve ıskāt eyledim, ba‘de’l-yevm müteveffâ-yı mezbûr Şevki Hüseyin Efendi’nin ve veresesi olan mezbûrların zimmetlerinde vechen mine’l-vücûh aslâ ve kat‘â hakkım bâkī kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 26 min-Receb sene 1143. Şuhûdü’l-hâl: Hancı el-Hâc Mehmed Ağa b. Murtaza, Ali Çelebi b. el-Hâc Mehmed Ağa, Osman Usta b. Mehmed, Berber Ahmed Çelebi b. Mehmed, Hallâç Ahmed b. Mahmud, Doğramacızâde Abdullah Çelebi, Küçük Mehmed b. Mustafa, Ömer b. İbrahim