Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 408 Hüküm no: 338 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Koltukçu İsmail’in varislerinin Düğmeci Ali’deki alacaklarını terekeden tahsil ettikleri Mahmiye-i İstanbul’da Edirnekapısı kurbünde el-Hâc Muhyiddin mahâllesinde sâkin iken bundan akdem vefât eden Koltukçu el-Hâc İsmail b. Mehmed’in verâseti zevce-i menkûha-i metrûkesi Rabia Hatun bt. Mehmed ile sulbî sagīr oğlu Mehmed’e münhasıra olduğu şer‘an zâhir ve mütehakkık oldukdan sonra sagīr-i mezbûrun vâlidesi ve tesviye-i umûruna kıbel-i şer‘den mansûbe vasiyyesi olup zâtı ta‘rîf-i şer‘î ile mu‘arrefe olan bâ‘isetü’l-kitâb mezbûre Rabia Hatun meclis-i şer‘-i enverde mahmiye-i mezbûrede sâkin iken bundan akdem vefât eden Düğmeci el-Hâc Ali b. Ahmed’in terekesine bi’l-verâse vâzı‘atü’l-yed olan zevce-i menkûha-i metrûkesi ve sulbî sagīr oğlu Mehmed vâlidesi ve tesviye-i umûruna kıbel-i şer‘den mansûbe vasiyyesi Zeyneb Hatun bt. Mustafa b. Abdurrahman tarafından vekîl-i müsecceli Ali Çelebi b. Mehmed ile âhar zevce-i menkûha-i metrûkesi ve sulbî sagīr oğlu Hüseyin’in vâlidesi ve tesviye-i umûruna kıbel-i şer‘den mansûbe vasiyyesi Saliha Hatun bt. Abdullah b. Abdullah’ın zevci ve tarafından vekîl-i müsecceli es-Seyyid Mehmed Çelebi b. Mustafa mahzarlarında bi’l-vesâye üzerlerine da‘vâ ve takrîr-i kelâm edip müteveffâ-yı mezbûr Düğmeci el-Hâc Ali b. Ahmed b. Abdurrahman hayâtında vasîsi olduğum sagīr-i mezbûr Emin Mehmed’in babası müteveffâ el-Hâc İsmail’in terekesini bey‘ esnâsında bir adedi çuka ferâce ve bir beyaz [75b] çuka çakşır ve bez kaliçe ve dört beyliğini iki bin beş yüz yirmi akçeye bey‘ ve teslîm ol dahi ber-vech-i muharrer iştirâ ve tesellüm ve kabz ettikden sonra meblağ-ı mezbûrun altı yüz akçesini hayâtında yedinden ahz u kabz edip bâkī bin dokuz [yüz] yirmi akçesini kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Tercümanyunus mahâllesinde sâkin Abdülbaki Efendi b. Ahmed Efendi ve Ahmed Çelebi b. İsmail ve Keçeci Piri mahâllesinde sâkin el-Hâc Hasan b. Mustafa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iye-i mezbûre Rabia Hatun vasiyyesi olduğu sagīr-i mezbûrun babası müteveffâ el-Hâc İsmail’in terekesini bey‘ esnâsında müteveffâ-yı mezbûr Düğmeci el-Hâc Ali b. Ahmed b. Abdurrahman hayâtında bir adedi çuka ferâce ve bir beyaz çuka çakşır ve bir kaliçe ve dört beyliğini iki bin beş yüz yirmi akçeye huzûrumuzda bey‘ ve teslîm, ol dahi yedinden ber-vech-i muharrer iştirâ ve tesellüm ve kabz ve kabûl eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra kabzını mu‘terife olduğu hâlde meblağ-ı mezbûr altı yüz akçeden mâ‘adâ meblağ-ı bâkī-i mezbûr [bin] dokuz yüz yirmi akçeyi dahi müteveffâ-yı mezbûr el-Hâc Ali’den hayâtında ahz ü istîfâ veyâ âhara havâle etmeyip taraf-ı şer‘îden bir tarîk ile müteveffâ-yı mezbûrun zimmetini ibrâ etmediğine müdde‘iye-i mezbûre Rabia Hatun’a yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm mezbûre Rabia Hatun yine meclis-i ma‘kūd-ı mezkûrda Ali Çelebi ve es-Seyyid Mehmed Çelebi mahzarlarında bi’l-vesâye ikrâr ve takrîr-i kelâm edip ânifen edâsına hükm-i şer‘î lâhık olan meblağ-ı bâkī-i mezbûr [bin] dokuz yüz yirmi akçeyi vekîlân-ı mezbûrân Ali Çelebi ve es-Seyyid Mehmed Çelebi yedlerinden bi’t-tamâm alıp kabz eyledim, meblağ-ı mezbûrdan mezbûrân yedlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 24 min-Receb sene 1143. Şuhûdü’l-hâl: Balizâde es-Seyyid Mustafa Efendi, Ahmed Efendi b. Osman, İbrahim Efendi b. el-Hâc Hasan, Salih Çelebi b. Halil, Hasan Efendi