Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 411 Hüküm no: 340 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in oğlu Mustafa’ya nafaka takdiri Mahmiye-i İstanbul’da Balaban Ağa mahâllesinde sâkin iken bundan akdem vefât eden Uzun Mehmed b. Abdülkadir’in sulbî sagīr oğlu Mustafa’nın vâlidesi ve hâzınesi işbu bâ‘isetü’l-kitâb Fâtıma Hatun bt. Abdullah meclis-i şer‘-i şerîf-i enverde ikrâr ve takrîr-i kelâm edip oğlum sagīr-i mezbûrun nafaka ve kisveye eşedd-i ihtiyâcı olmağla babası müteveffâ-yı mezbûrdan müntakil mâlından kıbel-i şer‘den kadr-ı ma‘rûf nafaka ve kisve-baha farz ve takdîr olunmak matlûbumdur dedikde mezbûre Fâtıma Hatun’un kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun babası müteveffâ-yı mezbûrdan müntakil mâlından beher yevm altışar akçe nafaka ve kisve-baha farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyesine harc u sarfa ve vakt-i hâcetde istidâneye ve inde’z-zafer mâlına rücû‘a mezbûre Fâtıma Hatun’a izin birle mâ vaka‘a bi’t-taleb ketb olundu. Fî 20 min-şehri Rebî‘ülûlâ sene 1143. Şuhûdü’l-hâl: İsmail Odabaşı, İsmail Ağa b. Mehmed, Ahmed Çelebi b. Abdullah, el-Hâc Mustafa b. Mehmed, el-Hâc Hasan b. Ahmed, Hasan Çelebi b. Hüseyin, Ahmed Çelebi b. Mustafa