Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 411 Hüküm no: 341 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un vasiyetini yerine getirmek üzere eşi Mehmed Ağa’yı vasi tayin ettiği Husûs-ı âti’l-beyanın mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Debbâğ Yunus mahâllesinde sâkin Mehmed Ağa b. Receb’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mezbûr Mehmed Ağa’nın hâlâ zevce-i menkûhası olup zâtı ta‘rîf-i şer‘î ile mu‘arrefe olan Afife Hatun bt. Hızır meclis-i ma‘kūd-ı mezkûrda bâ‘isü’l-kitâb mezbûr Mehmed Ağa mahzarında ikrâr ve takrîr-i kelâm edip ben hâlâ hasta ve alîletü’l-mîzâc olmağla bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olundukdan sonra terekemin sülüsü ifrâz olunup sülüs-i mezbûrdan üç bin akçe ile ıskāt-ı salâtım oluna ve hediyesi onar guruş kıymetlü üç kıt‘a mushaf-ı şerîf alınıp birer müstahak kimesnelere verile ve Molla Mehmed’e beş guruş ve Hafize Hatun’a beş guruş ve Emetullah Hatun’a beş guruş ve Hadîce Hatun’a on guruş verile ve sülüs-i mezbûrdan her ne fazla kalırsa vasiyy-i muhtârım re’yiyle vücûh-ı bir [ve] hayra harc u sarf oluna ve sülüsân-ı terekemden zevcim mezbûr Mehmed Ağa nısf hissesini ahz u kabz eyledikden sonra nısf-ı âharını dahi hâlim kızı olup gāib ani’l-meclis Âişe Hatun’a îsâl oluna deyü vasiyet edip tenfîzine zevcim mezbûr Mehmed Ağa’yı vasiyy-i muhtâr nasb u ta‘yîn ettikde ol dahi vesâyet-i mezkûreyi kabûl ve merâsimini edâya ta‘ahhüd ve iltizâm eyledim dediğini mevlânâ-yı mezbûr mahâllinde tahrîr, ba‘dehû ma‘an mürsel Ahmed Çelebi b. Ali ve Mehmed b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 20 min-Recebi’l-ferd sene 1143. Şuhûdü’l-hâl: el-Hâc İbrahim b. Mustafa, Süleyman Çelebi b. Mehmed berber, Ahmed Beşe b. Ali, Veliyüddin Beşe b. Yusuf, Mustafa Çelebi b. İbrahim, Ahmed Çelebi b. Ali, Mehmed Çelebi b. Ali