Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 429 Hüküm no: 357 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed’in vefat eden Ayşe Hatun’un terekesinden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden Mevlânâ Mehmed Efendi b. Osman irsâl olunup ol dahi mahmiye-i İstanbul’da Uzun Yusuf mahâllesinde sâkine iken bundan akdem vefât eden Âişe Hatun bt. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti sadrî kebîr oğlu Derviş Mehmed b. Halil ile sadriye kebîre kızı Hanife Hatun ile el-mezbûr Halil’e münhasıra ve tashîh-i meselesi üç sehmden olup sihâm-ı mezbûrenin iki sehmi mezbûr Derviş Mehmed’e ve bir sehmi mezbûre Hanife Hatun’a isâbeti tahakkukundan sonra mezbûr Derviş Mehmed meclis-i ma‘kūd-ı mezkûrda müteveffât-ı mezbûrenin bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden bâ‘isü’l-kitâb Süleyman Çelebi b. Mehmed ile zâtı ta‘rîf-i şer‘î ile mu‘arrefe olan mezbûre Hanife Hatun mahzarlarında ikrâr ve takrîr-i kelâm edip vâlidem müteveffât-ı mezbûrenin terekesi tahrîr ve ba‘de-ihrâci’l-masârıf ve’s-sülüs ber-mûceb-i defter-i kassâm-ı askerî tashîh-i mezbûr üzere hisseme isâbet eden sekiz bin iki yüz otuz dört akçeyi mezbûrân Süleyman Çelebi ve Hanife Hatun bana def‘ u teslîm, ben dahi tereke-i müteveffât-ı mezbûreden olmak üzere yedlerinden bi’t-tamâm ve’l-kemâl alıp kabz eyledim, min-ba‘d meblağ-ı mezbûr sekiz bin iki yüz otuz dört akçeden vasiyy-i mezbûr Süleyman Çelebi ile mezbûr Hanife Hatun yedlerinde bir akçe ve bir habbe hakkım bâkī kalmayıp vâlidem müteveffât-ı mezbûrenin terekesinden vasiyy-i mezbûrun makbûz ve masrûfuna müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûrânın zimmetlerini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an ba‘s olunan el-Hâc Mehmed b. Ahmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-Receb sene 1143. Şuhûdü’l-hâl: Abdülbaki Efendi b. Şaban İmam, el-Hâc Süleyman b. Osman, es-Seyyid Ali Beşe b. Şaban, Mustafa Bey b. Halil, Musa Ağa b. Mehmed, İbrahim Ağa b. Ahmed