Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 430 Hüküm no: 358 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Çelebi’nin oğlu Mehmed Çelebi’nin terekedeki hakkını vasiden aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Burusî Mehmed Efendi irsâl olunup ol dahi mahmiye-i İstanbul’da Küçük Ayasofya kurbünde Hüseyin Ağa mahâllesinde Abdurrahman Ağa b. Mehmed’in odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûrede sâkin iken bundan akdem vefât eden Ahmed Çelebi b. Mustafa’nın sulbî kebîr oğlu Mehmed Çelebi meclis-i ma‘kūd-ı mezkûrda li-ebeveyn ammi ve hâl-i sıgārında tesviye-i umûruna bâ-hüccet-i şer‘iyye vasiyy-i muhtârı olmağla hisse-i müntakılesine bi’l-vesâye vâzı‘ü’l-yed olan bâ‘isü’l-kitâb Mehmed Beşe b. el-me[z]bûr Mustafa mahzarında ikrâr ve takrîr-i kelâm edip ammim mezbûr Mehmed Beşe benim hâl-i sıgārımda tesviye-i umûruma vasî olmağla babam müteveffâ-yı mezbûrun terekesinden ber-mûceb-i defter-i kassâm-ı askerî hisseme isâbet eden yirmi iki bin yüz kırk bir akçe ile mahrûse-i Edirne’de vâki‘ mülk menzil semeninden dahi bana isâbet eden dört bin akçe ve ba‘dehû vefât eden vâlidem Havva Hatun’un terekesinden dahi bana isâbet eden sekiz bin on sekiz akçe ki cem‘an kırk dört bin yüz elli dokuz akçeyi vâlide ve vâlidemin terekelerinden olmak üzere ammim mezbûr Mehmed Beşe bana bi’d-defa‘ât def‘ ve teslîm edip ben dahi yedinden ber-vech-i muharrer bi’t-tamâm ve’l-kemâl ahz u kabz eyledim, meblağ-ı mecmû‘-ı mezkûr kırk dört bin yüz elli dokuz akçeden mezbûr Mehmed Beşe yedinde ve zimmetinde bir akçe ve bir habbe hakkım bâkī kalmayıp ammim mezbûr Mehmed Beşe’nin zamân-ı vesâyetinde müteveffiyân-ı mezbûrânın terekelerinden cemî‘ makbûz ve masrûfuna müte‘allıka âmme-i de‘âvî ve mutâlebât ve eymân ve muhâsamâtdan mezbûr Mehmed Beşe’nin zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an mürsel Ahmed Çelebi b. İsmail ve Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 25 min-Recebi’l-ferd sene 1143. Şuhûdü’l-hâl: [80a] Mustafa Efendi b. Abdüllatif, Mehmed Efendi b. Ahmed, Abdurrahman Çelebi b. Mehmed, İbrahim Halîfe b. Mahmud, el-Hâc Ali b. Osman, Abdullah Çelebi b. Mehmed, Emin Çelebi b. Süleyman, Mehmed Çelebi b. Mahmud, Hüseyin Çelebi b. Ali, Abdullah Ağa b. Hüseyin