Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 431 Hüküm no: 359 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vefat eden Kapıcıbaşı İshak Ağa’ya Rüsumat ve Şem-i asel Mukataası için ödediği paranın terekeden geri verilmesi Dârülhilâfeti’l-aliyye Kostantıniyetü’l-mahmiye’de hâlâ Gümrük-i âmire emîni umdetü’l-ekâbir ve’l-a‘yân el-Hâc İbrahim Ağa b. Ahmed b. Abdullah tarafından husûs-ı âti’l-beyanda vekîl olduğu Hasan Çelebi b. Ali ve Hasan Ağa b. Ahmed şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan bâ‘isü’l-kitâb el-Hâc İsmail Ağa b. Hasan meclis-i şer‘-i hatîr-i lâzimü’t-tevkīrde mahmiye-i mezbûrede Kumkapı kurbünde Nişâncıpaşa-i Atik mahâllesi ahâlîsinden iken bundan akdem vefât eden Dergâh-ı âlî kapıcıbaşılarından İshak Ağa b. Ali b. İsmail’in zevce-i menkûha-i metrûkesi ve evlâd-ı sıgārı Abdülkadir ve Saliha’nın vâlideleri ve tesviye-i emrlerine kıbel-i şer‘den mansûbe vasiyyeleri olmağla terekesine bi’l-vesâye ve bi’l-verâse vâzı‘atü’l-yed olan Âişe Hatun bt. Mehmed b. Abdullah tarafından kezâlik husûs-ı âti’l-beyanda vekîl-i müsecceli Ahmed Ağa b. Mahmud ile müteveffâ-yı mezbûrun vâlidesi olup zâtı ta‘rîf-i şer‘î ile mu‘arrefe olan diğer Âişe Hatun bt. Abdüllatif mahzarlarında bi’l-vekâle üzerlerine da‘vâ ve takrîr-i kelâm edip müteveffâ-yı mezbûr İshak Ağa b. Ali b. İshak hâl-i hayâtında işbu yedimde olan bin yüz kırk üç senesi târîhiyle müverrah mümzâ ve mahtûm temessük mûcebince mutasarrıf olduğu Rüsûmât ve Şem‘-i asel Mukāta‘ası’nın a‘şâr-ı şer‘iyyesinden sümün hissesini sene-i mezbûr Martı ibtidâsından bin kırk dört senesi Şubatı gāyetine gelince zabt etmek üzere müvekkilim mûmâ-ileyh el-Hâc İbrahim Ağa’ya bin beş yüz guruş bedel mukābelesinde tefvîz, ol dahi tefevvüz ve kabûl edip bedel-i merkūm olan meblağ-ı mezbûru müvekkilim mûmâ-ileyh müteveffâ-yı mezbûra huzûr-ı Müslimînde def‘ u teslîm, ol dahi yedimden tamâmen alıp kabz eyledikden sonra mukāta‘a-i mezbûrenin zabtı müyesser olmamağla meblağ-ı mezbûru bi’l-vekâle terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Müftü Ali mahâllesinde sâkin Mehmed Çelebi b. Hasan ve Soğan Ağa mahâllesinde sâkin Halil Ağa b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûrun yedinde olan bin yüz kırk üç senesi târîhiyle müverrah mümzâ ve mahtûm temessük mûcebince müteveffâ-yı mezbûr İshak Ağa b. Ali b. İshak hâl-i hayâtında mutasarrıf olduğu Rüsûmât ve Şem‘-i asel Mukāta‘ası’nın a‘şâr-ı şer‘iyyesinden sümün hissesini müvekkil-i mûmâ-ileyh el-Hâc İbrahim Ağa’ya sene-i mezbûre Martı ibtidâsından bin yüz kırk dört senesi Şubatı gāyetine gelince bin beş yüz guruş bedel mukābelesinde tefvîz, ol dahi tefevvüz ve kabûl edip meblağ-ı mezbûr bin beş yüz guruşu ber-vech-i muharrer yedinden müvekkil-i mûmâ-ileyh el-Hâc İbrahim Ağa yedinden huzûrumuzda tamâmen ahz u kabz eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-müvekkili’l-mezbûr mûcebiyle ba‘de’l-hükm mâ vaka‘a bi’t-taleb ketb olundu. Fî-gurreti Şa‘bâni’l-mu‘azzam sene 1143. Şuhûdü’l-hâl: Fahrü’l-müderrisîni’l-kirâm Yusuf Efendi, Hüseyin Bey b. İbrahim, Ahmed Çelebi b. Mustafa, Osman b. Hasan, Ali Beşe b. İbrahim, Mehmed Çelebi b. Yusuf, İbrahim Ağa b. Ahmed