Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 432 Hüküm no: 360 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vasiyetini yerine getirmek üzere Mustafa Ağa’yı vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden Mevlânâ Balizâde es-Seyyid Mustafa Efendi irsâl olunup ol dahi mahmiye-i İstanbul’da Kâtib Hüsrev mahâllesinde [sâkin] Mustafa Ağa b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde fi’l-asl vilâyet-i Anadolu’da Çankırı kasabası ahâlîsinden olup menzil-i mezbûrda misâfiren sâkin iken bundan akdem vefât eden el-Hâc Mehmed Ağa b. Hüseyin’in ber-vech-i âtî vasiyy-i muhtârı olduğunu iddi‘â eden işbu bâ‘isü’l-kitâb Mustafa Ağa b. Ahmed meclis-i ma‘kūd-ı mezkûrda müteveffâ-yı mezbûrun medyûnu İsmail Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed Ağa b. Hüseyin b. el-Hâc Mustafa fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī kalan terekem vilâyet-i Anadolu’da Çankırı kasabasında sâkine zevcelerim Salime bt. Abdullah ve Gülbeyaz bt. Abdullah ile sulbî kebîr oğlum İsmail’e îsâl oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ fevt olmağla işbu mezbûr İsmail Ağa zimmetinde müteveffâ-yı mezbûrun cihet-i deyn-i şer‘îden hakkı olan altı yüz akçeyi bi’l-vesâye taleb eylediğimde bana teslîmden imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûr İsmail Ağa cevâbında meblağ-ı mezbûr cihet-i merkūmeden zimmetinde müteveffâ-yı mezbûra vâcibü’l-edâ deyni olduğunu ikrâr lâkin müdde‘î-i mezbûrun ber-vech-i muharrer müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından Mustafa Çelebi b. Yusuf ve Mehmed Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed Ağa b. Hüseyin b. el-Hâc Mustafa fevtinden üç [gün] mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekem vilâyet-i Anadolu’da Çankırı kasabasında sâkine zevcelerim Salime bt. Abdullah ve Gülbeyaz bt. Abdullah ile sulbî kebîr oğlum İsmail’e îsâl oluna deyü vasiyet edip tenfîzine huzûrumuzda işbu müdde‘î-i mezbûr Mustafa Ağa b. Ahmed’i vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ mezbûr el-Hâc Mehmed vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde [80b] tahrîr, ba‘dehû ma‘an irsâl olunan el-Hâc Mehmed b. Ali ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 28 min-Recebi’l-ferd sene 1143. Şuhûdü’l-hâl: Fahrü’l-eşbâh Hüseyin Ağa, Ali Çelebi b. el-Hâc Abdüsselam, Mehmed Bey b. Mehmed, es-Seyyid Ali b. Mustafa, el-Hâc Mehmed b. Ali, Ahmed Çelebi b. Hasan, Mehmed Çelebi b. Mehmed, Mustafa Çelebi b. Yusuf ve gayruhum