Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 434 Hüküm no: 362 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Ağa’nın kızı Rukıye’nin vasisinden, annesi Ümmügülsüm’ün borç para aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Süleymaniye mahâllesi ahâlîsinden umdetü’l-a‘yân Süleyman Ağa b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahrûse-i Edirne mahâllâtından Kasab Abdülaziz mahâllesinde sâkin iken bundan akdem maktûlen vefât eden Ahmed Ağa b. Ali’nin sulbiye sagīre kızı Rukıye’nin vâlidesi olup zâtı ta‘rîf-i şer‘î ile mu‘arrefe olan Ümmügülsüm Hatun bt. Mustafa meclis-i ma‘kūd-ı mezkûrda sagīre-i mezbûrenin tesviye-i umûruna kıbel-i şer‘den mansûb vasîsi bâ‘isü’l-kitâb mûmâ-ileyh Süleyman Ağa mahzarında ikrâr ve takrîr-i kelâm edip kızım sagīre-i mezbûre Rukıye’nin babası müteveffâ-yı mezbûr Ahmed Ağa’dan müntakil mâlından vasiyy-i mûmâ-ileyh Süleyman Ağa yedinden istidâne ve kabz eylediğim bin dört yüz yetmiş guruş ile semeni târîh-i kitâbdan üç yüz altmış bir gün tamâmına değin müeccel ve mev‘ûd yine sagīre-i mezbûrenin mâlından vasiyy-i mûmâ-ileyh yedinden iştirâ ve kabz eylediğim bir kıt‘a mushaf-ı şerîf hediyesinden dahi yüz kırk yedi guruş ki cem‘an bin altı yüz on yedi guruşu alıp kabz edip meblağ-ı mezbûr bin altı yüz on yedi guruşu kızım sagīre-i mezbûre Rukıye’ye zimmetimde vâcibü’l-edâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel el-Hâc Veliyüddin b. Halil ve Mehmed b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 29 min-Receb sene 1143. Şuhûdü’l-hâl: Mehmed Efendi b. İbrahim, es-Seyyid Mehmed b. Ali, Ali Çelebi b. el-Hâc Mehmed, Ahmed Efendi b. el-Hâc Mehmed, el-Hâc Mustafa b. Hüseyin, Molla Mustafa b. Hasan