Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 435 Hüküm no: 363 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un evini istiğlal yoluyla Hasan Ağa’ya sattığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Mustafa Efendi irsâl olunup ol dahi mahmiye-i İstanbul’da Kâtib Muslihiddin mahâllesinde sâkin <> es-Seyyid Mesud Efendi b. Kasım Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Mesih Hasan Paşa mahâllesinde sâkine olup zâtı ta‘rîf-i şer‘î ile mu‘arrefe olan Afife Hatun bt. Mehmed meclis-i ma‘kūd-ı mezkûrda işbu bâ‘isü’l-kitâb Hasan Ağa b. Abdülkadir mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mârrü’z-zikr Kâtib Muslihiddin mahâllesinde vâki‘ bir tarafdan mezbûr es-Seyyid Mesud Efendi mülkü ve bir tarafdan Hasan Ağa mülkü ve iki tarafdan tarîk-i âm ile mahdûd hâriciyede fevkānî iki bâb oda ve bir dehliz ve bir kenîf ve dâhiliyede fevkānî iki oda ve bir sofa ve bir dehliz ve bir kenîf ve tahtânî bir matbâh ve bir bi’r-i mâ ve bir mikdâr havluyu müştemil mülk menzilimi mezbûr Hasan Ağa’ya [81a] yüz seksen guruşa bi-tarîkı’l-istiğlâl bey‘ ve teslîm, ol dahi ber-vech-i muharrer iştirâ ve tesellüm ve kabz ve kabûl edip semeni olan meblağ-ı mezbûr yüz seksen guruşu mezbûr Hasan Ağa yedinden tamâmen ahz u kabz eylediğimden sonra menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î târîh-i kitâbdan bir sene tamâmına değin beher mâh ikişer guruşa bana icâr ve teslîm, ben dahi ber-vech-i muharrer isticâr ve kabz ve kabûl eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel el-Hâc İbrahim b. Hüseyin ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 4 min-Şa‘bân sene 1143. Şuhûdü’l-hâl: Es-Seyyid Mesud Efendi b. Kasım Ağa, el-Hâc Mehmed b. Salih, Mustafa Efendi b. İbrahim, Mehmed Ağa b. Abdullah, Mehmed Ağa b. Hasan