Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 436 Hüküm no: 364 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’dan kalan evin, vasisi Mesud Efendi tarafından diğer Afife Hatun’a satıldığı Kezâlik akd-i meclis-i şer‘-i şerîf ettikde müteveffât-ı mezbûrenin verâseti zât-ı rahm cihetinden hasran vârisi diğer Afife Hatun bt. Mehmed’e münhasıra ve müteveffât-ı mezbûrenin sülüs vasiyeti olmağla tashîh-i meselesi üç sehmden i‘tibâr olunup sihâm-ı mezbûrenin bir sehmi sülüs vesâyâsına ve iki sehmi mezbûre Afife Hatun’a isâbeti tahakkukundan sonra müteveffât-ı mezbûrenin vesâyâsını tenfîze bâ-hüccet-i şer‘iyye vasiyy-i muhtârı es-Seyyid Mesud Efendi b. Kasım Ağa meclis-i ma‘kūd-ı mezkûrda işbu bâ‘isü’l-kitâb mezbûre Afife Hatun mahzarında bi’l-vesâye ikrâr ve takrîr-i kelâm edip müteveffât-ı mezbûrenin ile’l-vefât yedinde mülk ve hakkı idiği müsbet olup mahâlle-i mezbûrede vâki‘ bir tarafdan benim mülküm ve bir tarafdan Hasan Ağa mülkü ve iki tarafdan tarîk-i âm ile mahdûd dâhiliyede fevkānî iki bâb oda ve bir sofa ve bir dehliz ve bir kenîf ve tahtânî bir matbâh ve bi’r-i mâ ve kenîf ve havlu ve hâriciyede fevkānî iki bâb oda ve bir dehliz ve tahtında bir kenîfi müştemil mülk menzilin sülüsü beyne’t-tâlibîn nidâ ve müzâyede olunup rağabât-ı nâs bi’l-külliye munkatı‘a oldukdan sonra mezbûre Afife Hatun üzerinde iki yüz guruşda karâr edip ziyâde ile tâlib-i âhar zuhûr etmediğinden mâ‘adâ meblağ-ı mezbûr menzil-i mahdûd-ı mezbûrun el-yevm semen-i misli idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve mukarrer olmağın menzil-i mahdûd-ı mezbûrun sülüsünü meblağ-ı mezbûr iki yüz guruşa mezbûre Afife Hatun’a bi’l-vesâye bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezbûr iki yüz guruşu mezbûre Afife Hatun yedinden müteveffât-ı mezbûrenin vesâyâsını tenfîz için vesâyetim hasebiyle bi’t-tamâm ve’l-kemâl alıp ahz u kabz eyledim, ba‘de’l-yevm menzil-i mahdûd-ı mezbûrun sülüsü mezbûre Afife Hatun’un mülk-i müşterâsı olmuşdur, keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an mürsel mezbûrân ( ) mâ vaka‘a bi’t-taleb ketb olundu. Fî 20 min-Receb sene 1143. Şuhûdü’l-hâl: el-Hâc Mehmed b. Mustafa, el-Hâc Mehmed b. Salih, Hasan Ağa b. Abdülkadir, es-Seyyid Abdullah Çelebi b. es-Seyyid Mustafa, Mustafa Efendi b. İbrahim, Hüseyin Halîfe b. Himmet