Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 436 Hüküm no: 365 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Afife Hatun’un vefat eden diğer Afife Hatun’un varisi olduğu
Kezâlik akd-i meclis-i şer‘-i şerîf ettikde mahâlle-i mezbûrede sâkine iken bundan akdem vefât eden Afife Hatun bt. Mustafa’nın zât-ı rahm cihetinden ber-vech-i âtî vârise olduğunu iddi‘â eden işbu bâ‘isetü’l-kitâb diğer Afife Hatun bt. Mehmed meclis-i ma‘kūd-ı mezkûrda müteveffât-ı mezbûrenin vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden mûmâ-ileyh es-Seyyid Mesud Efendi mahzarında üzerine da‘vâ ve takrîr-i kelâm edip müteveffât-ı mezbûre Afife’nin babası Mustafa benim babam Mehmed’in babası Mehmed ile li-ebeveyn karındaşlar olup babaları ismi Yakub ve dedeleri ismi Abdurrahman ve vâlideleri ismi Zeyneb bt. Abdullah ve maskat-ı re’sleri mahmiye-i mezbûrede Ali Paşa Çarşısı kurbünde Mesih Hasan Paşa mahâllesi olup müteveffât-ı mezbûrenin verâseti cihet-i mezbûreden ancak bana münhasıra ve terekesine benden gayrı vâris ve müstahakk-ı âhar olmamağla mûrisem müteveffât-ı mezbûrenin terekesinden hisse-i ırsiye-i ma‘lûmemi taleb eylediğimde vasiyy-i mezbûr bana teslîmden imtinâ‘ eder, suâl olunsun dedikde gıbbe’s-suâl vasiyy-i mezbûr cevâbında tereke-i müteveffât-ı mezbûreye ber-vech-i muharrer vaz‘-ı yedini ikrâr ve müdde‘iye-i mezbûrenin ber-vech-i muharrer müdde‘âsını inkâr edicek, müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden olup mahâlle-i mezbûrede sâkin el-Hâc Mehmed b. Mustafa ve Hasan Ağa b. Abdülkadir li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka işbu müdde‘iye-i mezbûre Afife Hatun’un babası Mehmed’in babası Mehmed müteveffât-ı mezbûre Afife Hatun’un babası Mustafa ile li-ebeveyn karındaşlar olup babaları ismi Yakub ve dedeleri ismi Abdurrahman ve vâlideleri ismi Zeyneb bt. Abdullah ve maskat-ı re’sleri mahmiye-i mezbûrede Ali Paşa Çarşısı kurbünde Mesih Hasan Paşa mahâllesi olup müteveffât-ı mezbûrenin verâseti zât-ı rahm cihetinden ancak müdde‘iye-i mezbûre Afife Hatun’a münhasıra olup terekesine bundan gayrı vâris ve müstahakk-ı âhar olduğu ma‘lûmumuz değildir, biz bu husûsa bu vech üzere ilâ-âhırihî.
Fî 4 min-Şa‘bân sene 1143.
Eş-şâhidûnü’s-sâbıkūn
|