Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 437 Hüküm no: 366 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Attar İsmail Ağa’nın mirasçıları arasında sulh olduğu Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Salih Efendi irsâl olunup ol dahi mahmiye-i İstanbul’da Ayasofya-i Kebîr kurbünde Üskübî mahâllesinde sâkin iken bundan akdem vefât eden Mısır Çarşısı attârlarından el-Hâc İsmail Ağa b. Halil’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Emine Hatun bt. Abdullah ile sulbiye kebîre kızı Ümmühani Hatun’a ve li-ebeveyn er karındaşı oğlunun oğlu Abdülkerim Çelebi b. Osman’a münhasıra ve tashîh-i meselesi sekiz sehmden olmağla sihâm-ı mezbûrenin bir sehmi zevce-i mezbûreye ve dört sehmi mezbûre Ümmühani Hatun’a ve bâkī üç sehmi mezbûr Abdülkerim Çelebi’ye isâbeti tahakkukundan sonra mezbûr Abdülkerim Çelebi meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezbûre Emine Hatun mahzarında ikrâr ve takrîr-i kelâm edip mûrisim müteveffâ-yı mezbûrun eşyâ-i memlûkesinden işbu yedimde olan müfredât defteri mûcebince mecmû‘u yüz guruş kıymetli eşyâ-i ma‘lûme ile bin beş yüz guruş kıymetli işbu akd-i meclis olunan mülk menzilde bâ-hüccet-i keşf bi-tarîkı’l-münâsahati’ş-şer‘iyye bin yedi yüz yirmi sekiz sehmden yüz altmış sekiz sehim menzil hissesinden tashîh-i mezbûr üzere üç sehim hisse-i ma‘lûmemi mezbûre Emine Hatun’dan taleb ve da‘vâ eylediğimde ol dahi eşyâ-i muharrere-i mezbûreyi bi’l-külliye inkâr ve menzil-i mezbûrda olan müteveffâ-yı mezbûrun ber-vech-i muharrer hisse-i mezkûresini ikrâr lâkin zevcim müteveffâ-yı mezbûr hayâtında menzil-i mezbûrda olan hisse-i merkūmesini cemî‘ müştemilâtıyla tarafeynden îcâb ve kabûlü hâvî bey‘-i kat‘î ile iki yüz elli guruş semen-i makbûza bana huzûr-ı Müslimînde bey‘ ve temlîk, ben dahi ber-vech-i peşîn iştirâ ve kabûl etmekle menzil-i mezbûrda olan hisse-i merkūme benim mülk-i müşterâm olmuşdur deyü def‘ ve def‘-i meşrûhunu isbât sadedinde olmağla beynimizde münâza‘ât-ı kesîre ve muhâsamât-ı şedîde vâki‘ olmuş idi, el-hâletü hâzihi muslihûn tavassut edip da‘vâ-i mezbûremden beni mezbûre Emine Hatun ile yüz elli guruş üzerinde inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu mezbûre Emine Hatun yedinden bi’t-tamâm ve’l-kemâl alıp kabz edip müdde‘âm olan eşyâ-i muharrere-i mezbûre ile zikr olunan menzil hissesine müte‘allıka âmme-i da‘vâdan ve mutâlebât ve eymân ve muhâsamâtdan mezbûre Emine Hatun’un zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ali Ağa b. Mehmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min-Cemâziyelâhire sene 1143. Şuhûdü’l-hâl: el-Hâc Mustafa Efendi b. Osman Efendi Ayasofya kayyûmbaşısı, Mehmed Efendi b. Mahmud İmam-ı mahâlle-i mezbûre, Müezzin Hasan Efendi b. Halil, Mehmed Çelebi b. Ahmed attâr, es-Seyyid Mehmed Çelebi b. Ahmed, Ahmed Efendi b. İsmail Bey, Molla Osman b. Mehmed, Ali Ağa Çukadâr, Halil Çelebi attâr