Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 438 Hüküm no: 367 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa’nın hayattayken bir meselenin halli için Mustafa Ağa’ya verdiği parayı terekeden talep ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Sadi Ali Efendi irsâl olunup ol dahi mahmiye-i İstanbul’da Kebeciler Hanı kurbünde Astarcılar Hanı’na varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Tavukpazarı kurbünde Filibelizâde Hanı’nda sâkin işbu bâ‘isü’l-kitâb Mahmud Ağa b. Mehmed meclis-i ma‘kūd-ı mezkûrda mahmiye-i merkūmede Sekbânbaşı Yakub Ağa mahâllesi ahâlîsinden iken bundan akdem maktûlen vefât eden Silahşor Camusçu el-Hâc Mustafa Ağa b. Seydi’nin sulbiye sagīre kızları Ümmügülsüm ve Âişe’nin li-ebeveyn ammileri ve tesviye-i emrlerine kıbel-i şer‘den mansûb vasîleri olmağla tereke-i müteveffâ-yı mezbûra bi’l-vesâye vaz‘-ı yed eden Ahmed Ağa b. el-mezbûr Seydi mahzarında üzerine da‘vâ ve takrîr-i kelâm edip müteveffâ-yı mezbûr Silahşor Camusçu el-Hâc Mustafa Ağa b. Seydi b. Abdullah’a hayâtında bin yüz kırk iki senesi Şa‘bânı’nın sekizinci günü bir husûsun temşiyeti için bi-tarîkı’r-rüşvet mâlımdan yüz guruşluk para huzûr-ı Müslimînde yedine def‘ u teslîm, ol dahi yedimden ahz u kabz edip husûs-ı mezbûr husûle gelmeyip ve meblağ-ı mezbûru kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden zikr olunan Esirci Hanı’nda sâkin Mustafa Çelebi b. Abdullah ve diğer Mustafa Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka işbu müdde‘î-i mezbûr Mahmud Ağa müteveffâ-yı mezbûr Silahşor Camusçu el-Hâc Mustafa Ağa b. Seydi b. Abdullah’a hayâtında bin yüz kırk iki senesi Şa‘bâni’l-mu‘azzamın sekizinci günü bir husûsun temşiyeti için bi-tarîkı’r-rüşvet mâlından yüz guruşluk para yedine def‘ u teslîm, merkūm el-Hâc Mustafa Ağa dahi yedinden ahz u kabz eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri [82a] makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan el-Hâc Mehmed b. Ahmed ve Ali Çelebi b. İbrahim ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1143. Şuhûdü’l-hâl: Es-Seyyid Ahmed Çelebi b. Mehmed, es-Seyyid Ahmed Ağa b. Mahmud, Hüseyin Çelebi b. Ali, Mustafa Çelebi b. Osman, Yusuf Çavuş b. Abdullah, Mustafa Çelebi b. Mustafa