Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 439 Hüküm no: 368 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atmaca Hamza Ağa’nın vefat eden Mustafa Ağa’da alacağı olduğu Mahmiye-i İstanbul’da Firuz Ağa mahâllesi ahâlîsinden olup vilâyet-i Anadolu’da Maraş kasabasında sâkin Silahşor Atmaca Hamza Ağa b. Abdullah b. Abdullah tarafından husûs-ı âti’l-beyanda vekîl olduğu Bezzâzistânî el-Hâc Osman b. Ali ve Süleyman Çavuş Ağa b. Ali şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm olunan işbu bâ‘isü’l-kitâb Bezzâzistânî Hasan Ağa b. Murtaza meclis-i şer‘-i şerîf-i lâzimü’t-teşrîfde mahmiye-i mezbûrede Sekbânbaşı Yakub Ağa mahâllesinde sâkin iken bundan akdem maktûlen vefât eden Silahşor Camusçu el-Hâc Mustafa Ağa b. Seydi’nin li-ebeveyn er karındaşı ve sulbiye sagīre kızları Âişe ve Ümmügülsüm’ün tesviye-i emrlerine kıbel-i şer‘den mansûb vasîleri olmağla terekesine bi’l-vesâye vaz‘-ı yed eden el-Hâc Ahmed Ağa b. Seydi b. Abdullah mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Silahşor Camusçu el-Hâc Mustafa Ağa b. Seydi b. Abdullah zimmetinde müvekkilim mezbûr Atmaca Hamza Ağa b. Abdullah’ın cihet-i karz-ı şer‘îden iki yüz guruş hakkı olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde müvekkilim mezbûra zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden bi’l-vekâle taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Akarçeşme kurbünde Emin Sinan mahâllesinde sâkin Hüseyin Çelebi b. Ali ve müteveffâ-yı mezbûrun akrabâsından Abdurrahman b. el-Hâc Bilal li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Silahşor Camusçu el-Hâc Mustafa Ağa b. Seydi b. Abdullah hâl-i kemâl-i sıhhatinde müvekkil-i mezbûr Atmaca Hamza Ağa b. Abdullah’a cihet-i karz-ı şer‘îden iki yüz guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’l-müvekkili’l-mezbûr mûcebiyle ba‘de’l-hükm mâ vaka‘a bi’t-taleb ketb olundu. Fî 4 min-Şa‘bâni’l-mu‘azzam sene 1143. Şuhûdü’l-hâl: Mustafa Çavuş b. Abdullah, Yusuf Çavuş Ağa b. Abdullah, Kanbur Süleyman Çelebi b. Abdullah, Mustafa Ağa b. Mustafa, el-Hâc Mehmed b. Ahmed, Ali Ağa b. Mehmed, Hüseyin Çelebi b. İslam