Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 441 Hüküm no: 371 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefatıyla çocukları Mehmed ve Fatıma’ya nafaka takdiri Mahmiye-i İstanbul’da Şeyh Ebulvefâ kurbünde Molla Hüsrev mahâllesinde sâkine iken bundan akdem vefât eden Âişe Hatun bt. Yusuf Efendi’nin sadrî sagīr oğlu Mehmed ve sadriye sagīre kızı Fâtıma’nın babaları ve vasîleri ve tesviye-i emrlerine kıbel-i şer‘den mansûb vasîleri olan işbu bâ‘isü’l-kitâb umdetü erbâbi’t-tahrîr ve’l-kalem Mustafa Efendi b. Süleyman talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr Mehmed’e vâlidesi müteveffât-ı mezbûreden müntakil mâlından târîh-i kitâbdan beher yevm sekiz akçe ve sagīre-i mezbûre Fâtıma’ya dahi kezâlik mâl-ı müntakılinden târîh-i kitâbdan beher yevm dörder akçe ki cem‘an yevmî on iki akçe sagīrân-ı mezbûrâna nafaka ve kisve-baha farz ve takdîr buyurup meblağ-ı mecmû‘-ı mezbûr yevmî on iki akçeyi sagīrân-ı mezbûrânın nafaka ve kisve-baha ve sâir levâzım-ı zarûriyelerine harc u sarfa ve vakt-i hâcetde istidâneye ve lede’z-zafer mâllarına rücû‘a vasiyy-i mezbûr Mustafa Efendi’ye izin birle mâ vaka‘a bi’t-taleb ketb olundu. Fî-gurreti Şa‘bâni’l-mu‘azzam sene 1143. Şuhûdü’l-hâl: Umdetü’l-a‘yân Süleyman Bey b. el-merhûm Mehmed Bey, Hasan Çelebi b. Yusuf, Ahmed Çelebi b. Mustafa, Ali Çelebi b. İbrahim, Mehmed Çelebi b. Ahmed